Elimizge ımporttalatyn qant shıkizatyna kvota engiziledi

ASTANA. QazAqparat – Bıylǵy 31 jeltoqsanǵa deıin Qazaqstan aýmaǵyna 350 myń tonna shıki qant ákelýge kvota belgilenýi yqtımal, dep habarlaıdy QazAqparat tilshisi.

«Qazaqstan Respýblıkasynyń aýmaǵyna quraq qanty shıkizatyn ákelýge arnalǵan kvotanyń mólsheri 350 000 tonna bolyp belgilensin. Kvotanyń qoldanylý merzimi – 2023 jylǵy 22 sáýirden 31 jeltoqsanǵa deıin», - dep kórsetilgen «Ashyq» NQA portalynda jarııalanǵan Aýyl sharýashylyǵy mınıstriniń buıryǵynda.

Eske salaıyq, 30 naýryzda onlaın formatta ótken EEK Keńesiniń otyrysynda qatysýshylar Qazaqstanǵa shıki qantty bajsyz ákelý usynysyn biraýyzdan qoldaǵan edi.

Al, Saýda jáne ıntegratsııa birinshi vıtse-mınıstri Arman Shaqqalıevtiń aıtýynsha, búginde 18 óńir shıki qantty satyp alý jáne qaıta óńdeý úshin 18,3 mlrd teńge somasynda qant zaýyttaryn qarjylandyrdy.