Elimizdiń joǵary oqý oryndary - ÚIID strategııasynyń basty sýbektileri - Ǵ. Mutanov

ALMATY. QazAqparat - Elimizdiń joǵary oqý oryndary - údemeli ındýstrııalyq-ınnovatsııalyq damý strategııasynyń basty sýbektileri. Bul týraly búgin Almatyda ál-Farabı atyndaǵy QazUÝ-da ótken Ulttyq forýmda ýnıversıtet rektory, tehnıka ǵylymdarynyń doktory Ǵalym Mutanov «Injenerlik bilim berýdi akkredıtatsııalaýdyń eýropalyq jelisi aıasynda jaratylystaný jáne tehnıkalyq oqý baǵdarlamalaryn halyqaralyq akkredıtatsııalaý» taqyrybynda ótken forýmda málimdedi.

Ǵalym Mutanovtyń aıtýynsha, qazirgi zamanda eńbek naryǵyna sáıkes keletin bilikti mamandar tek joǵary oqý oryndarynda daıarlanady.

«Al kez kelgen eldiń ındýstrııalyq-ınnovatsııalyq damý bolashaǵy bilikti mamandaryna tikeleı baılanysty. Qazir joǵary oqý oryndaryna qoıylar talap kúsheıdi. Elimizge ınvestıtsııa, jańa tehnologııalar, jańa kompanııalar kelip jatyr. Al, olarǵa bizdiń jas mamandar daıyn ba? Olardyń biliktiligi zaman talabyna saı ma? Saı bolýy úshin ne isteý kerek? Birinshi kezekte oqý baǵdarlamalary álemdik standarttarǵa saı bolýy qajet. Al, olardyń sáıkestigin tek akkredıtatsııalaý arqyly ǵana bilýge bolady», - dedi óz sózinde Ǵalym Mutanov.

Qazir Ulttyq ýnıversıtet Tempýs QUEECA «Ortalyq Azııadaǵy ınjenerlik bilim sapasy» atty jalpy eýropalyq jobany qolǵa alǵan. Jobanyń maqsaty - Ortalyq Azııa elderinde halyqaralyq talaptarǵa jaýap beretin Akkredıtatsııalyq ortalyqtar qurý. Bul birneshe kezeńnen turady. Birinshi kezekte, sarapshylar daıarlaý. Keıin, atalmysh joba aıasynda joǵary oqý oryndaryndaǵy jaratylystaný jáne tehnıkalyq oqý baǵdarlamalaryn kásibı turǵyda akkredıtatsııalaý jáne olarǵa «EUR-ACE Label» atty eýropalyq sapa belgisin berý. Osydan keıin, elimizde joǵary oqý oryndaryna arnalǵan eýropalyq bilim berý standarttary jasalady.

Forým jumysyna eýropalyq Tempýs QUEECA jobasynyń áriptesteri, ENAEE uıymynyń jetekshi mamandary jáne Qazaqstan joǵary oqý oryndarynyń rektorlary qatysty. Forým sońynda qazaqstandyq sarapshylarǵa sertıfıkattar tabys etildi.