Elimizdiń turǵyn úı-kommýnaldyq sharýashylyǵy ınvestıtsııalar úshin tartymsyz - S.Nokın
«2011 jyly turǵyn úı kommýnaldyq sharýashylyǵyndaǵy ózekti túıtkilderdi sheshý maqsatynda QR Úkimeti «2020 jylǵa deıin arnalǵan Turǵyn úı-kommýnaldyq sharýashylyǵyn jańǵyrtý» baǵdarlamasyn jasady. On jyl ishinde osy baǵdarlama aıasynda 81 myń shaqyrymnan astam jylý, elektr jáne gazben qamtamasyz etý jelilerin jańǵyrtý kózdelgen. Úsh jylǵa tek respýblıkalyq bıýdjetten turǵyn úı-kommýnaldyq jelilerine 34 mlrd. teńge bólinip otyr. Naqtyraq aıtqanda, 173 jobany jańǵyrtý mejelengen. Turǵyn úı-kommýnaldyq jelilerin jańǵyrtý salasyndaǵy eń basty másele memlekettik emes ınvestıtsııalardy tartý tetikteriniń joqtyǵy jáne memlekettik-jekemenshik seriktestik damýynyń áljýazdyǵy. Kásiporyndardyń qarjylyq qıyndyqtary, tozyǵy jetken jeliler, TKSh salasyndaǵy ashyqtyqtyń joqtyǵy - bul salany ınvestıtsııalar úshin tartymsyz etip otyr», - dep atap ótti vıtse-mınıstr.
Osy maqsatta konferentsııada Norvegııa, Germanııa, Polsha jáne Reseı elderiniń turǵyn úı-kommýnaldyq sharýashylyǵyn damytý jáne energoúnemdilik, memlekettik emes ınvestıtsııalardy tartý máseleleri boıynsha tájirıbelerin talqylaý josparlanǵan.
Onyń aıtýynsha, respýblıkada 110 myńnan astam turǵyn úı qory bar. Olardyń basym bóligi 90-shy jyldardan beri kúrdeli jóndeý kórmegen, sondyqtan olardyń tehnıkalyq jaǵdaıy múshkil kúıde. Osy sebepti baǵdarlama aıasynda turǵyn úılerdi jańǵyrtýǵa qaıtarymdy negizde bıýdjetten qarajat bólinýde. Páter ıeleri bul qarajatty aı saıyn tirkelgen somada bólip óteıtin bolady.
«2011-2012 jyldar aralyǵynda turǵyn úı qoryn jóndeýge 17,8 mlrd. teńge bólinip, 1200-ge tarta úı jóndeldi. Turǵyn úılerdi jańǵyrtýǵa jyl saıyn túsetin ótinishterdiń sany kóbeıýde. Eki jyl ishinde turǵyndar termojańǵyrtýǵa bólingen qarjynyń 1,5 mlrd. teńgesin qaıtaryp úlgerdi. Bul qarjy ózge jobalarǵa qaıta baǵyttalyp jatyr», - dedi S.Nokın.
