Elimizdiń shıkizatqa táýeldiligi ınnovatsııanyń jetkiliksizdiginen – Janseıit Túımebaev

ALMATY. QazAqparat - Prezıdent óz Joldaýynda ádiletti qoǵam ornatýdyń basty baǵdary - eldiń áleýmettik-ekonomıkalyq jaǵdaıyn kóterý ekenin aıtty. Rasymen, eldiń turmystyq jaǵdaıy túzelmeı, ózge salada jetistikke jetýimiz neǵaıbil. Bul týraly ál-Farabı atyndaǵy Qazaq ulttyq zertteý ýnıversıtetiniń Basqarma tóraǵasy – rektory Janseıit Túımebaev aıtty, dep habarlaıdy QazAqparat tilshisi.

Rektordyń aıtýynsha, búginde elimizdiń ekonomıka salasynda qordalanǵan túıtkilder jeterlik.

«Elimizdiń áli kúnge deıin shıkizatqa táýeldi bolyp otyrýy eńbek ónimdiliginiń tómendiginen, ınnovatsııanyń jetkiliksizdiginen ekeni jasyryn emes. Ulttyq tabystyń ıgiligin eldiń bári birdeı kórýi úshin onyń naqty joldaryn qarastyrý qajet. Makroekonomıkalyq turaqtylyqty qamtamasyz etý, ekonomıkany ártaraptandyrý jáne tsıfrlandyrý, sonymen qatar, shaǵyn jáne orta bıznes pen adam kapıtalyn damytý, zań ústemdigin ornyqtyrý kezek kúttirmes másele. Damyǵan elder ekonomıkasynda shaǵyn jáne orta kásipkerliktiń róli basym. Kópten beri aıtylyp jatqanymen, elimizde bul salada olqylyqtar az emes», - dedi Janseıit Túımebaev.

Ol sondaı-aq Prezıdentttiń bos jatqan jerdi memleketke qaıtarý jumystaryna qatysty óz oıyn: «Mundaı qaraýsyz, kútimsiz bos jatqan jerler eginniń, maldyń jaıyn biletin sharýaǵa tıse, bul óz kezeginde qarapaıym sharýanyń eńbek etip, turmysy túzelýine oń áser eter edi», - dep jetkizdi.

Janseıit Túımebaevtyń aıtýynsha, búginde Qazaq ulttyq ýnıversıtetinde ǵalymdardan qurylǵan arnaıy sarapshylar «Qańtar oqıǵasynyń» sebep-saldaryna úńilip, qoǵamdaǵy túıtkildi máselelerge ǵylymı-taldaýlar men arnaıy áleýmettik monıtorıng júrgizýde.

«Ekspertterimiz quqyqtyq baǵalaý, modeldeý jumystaryn júrgizip, ıdeologııalyq sıpattaǵy is-sharalardy ótkizýdiń ádisteri men tehnologııalaryn, áleýmettik-tárbıe jumystaryn tıimdi uıymdastyrýdyń ádistemelik nusqaýlaryn, algorıtmderin qarastyrýda. Osy máselelerdi jan-jaqty talqylaý maqsatynda ár salanyń bilikti mamandarynyń qatysýymen ýnıversıtettiń YouTube arnasynan apta saıyn qazaq, orys tilderinde «Oıtalqy», «Mozgovoı shtýrm» baǵdarlamalary iske qosyldy», - dedi ol.

Prezıdenttiń stýdentterdi jataqhanamen qamtamasyz etý máselesine qatysty rektor búginde QazUÝ-da 2022-2026 jyldarǵa arnalǵan damý baǵdarlamasyna sáıkes, jumys istep turǵan 14 jataqhanany qaıta jańǵyrtyp, jańadan 6 jataqhana salý josparlanǵanyn aıtty.

Joldaýda aıtylǵan «bilim alýǵa jyldyq ósimi 2-3% bolatyn jeńildetilgen nesıege» qatysty Janseıit Túımebaev balasy aqyly bólimde oqıtyn ata-analarǵa nemese tolyq emes otbasylardan shyqqan stýdentterge bul nesıe bilim alyp, maman ıesi atanýyna jasalǵan jeńildik ekenin atap ótti.

Ol sondaı-aq qazirgi tańda qazaqstandyq joǵary oqý oryndarynyń aldynda otandyq ǵylymı-zertteý nátıjeleriniń álemdik naryqtaǵy básekege qabilettiligin arttyrý, olardy kommertsııalandyrý jáne ekonomıkaǵa engizý maqsaty turǵanyn, keler jyly 4 ese kóbeıtilgen ǵylym salasyna bólinetin qarjynyń úlken qoldaý ekenin jetkizdi.