Elimizdiń oıyn-saýyq ortalyqtarynda kóńil kóterý sharalary toqtatyldy
Aldaǵy úsh kúnde MEGA oıyn-saýyq ortalyǵynyń barlyq qaladaǵy fılıaldary kóńil kóterý sharalaryn ótkizbeıdi.
«Qurmetti qonaqtar, respýblıka boıynsha MEGA saýda, oıyn-saýyq ortalyǵy jelilerinde juma, senbi, jeksenbi (20, 21, 22 shilde) kúnderine josparlanǵan barlyq kóńil kóterý sharalary toqtatylady», - dep habarlady MEGA saýda, oıyn-saýyq ortalyǵynyń baspasóz qyzmeti áleýmettik jelide.
Sondaı-aq, Almatydaǵy Esentai Mall saýda ortalyǵynyń ákimshiligi 21 shildege josparlanǵan kontsertti ótkizbeýdi uıǵarǵan.
«Denıs Tenniń jaqyndary men týystaryna jáne tutas álemdegi fanattaryna qaıǵyra kóńil aıtamyz. Qaıǵyly oqıǵaǵa baılanysty, Esentai Mall saýda ortalyǵynyń ákimshiligi 21 shildege josparlanǵan Esentai MusicFestival kontsertin ótkizbeý týraly sheshim qabyldady», - dep habarlady ortalyq.
Sondaı-aq, Qazaqstandaǵy kóńil kóterý telearnalary Denıs Tenniń qazasyna baılanysty túrli-tústi habar taratýdan bas tartty.
«Denıs Tenniń mezgilsiz ómirden ozýyna baılanysty búgin jáne erteń Gakku, Toı Dýman arnasynyń efıri qara-aq nusqada kórsetiledi. Al, Gakku FM, Love Radio jáne Dacha FM-de barlyq oıyn-saýyq baǵdarlamalar efırge shyqpaıtyn bolady. Kórermenderimiz ben tyńdarmandarymyz bul jaǵdaıǵa túsinistikpen qaraıdy degen oıdamyz», - dep habarlady Gákký mýzykalyq telearnasy.
Aıta ketsek, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
