Elimizdiń kómir ónerkásibi salasyna ınnovatsııalyq jobalar engizilmek
Qazaqstanda kómir ónerkásibiniń barlyq negizgi segmenti bar, ásirese, energetıkalyq kómirdi óndirý men paıdalaný erekshe damyǵan. Kómir ónerkásibi ekonomıkanyń iri salalarynyń biri jáne elektr energııasyn, koks-hımııa óndirisiniń tolyq júktemesin qamtamasyz etedi. Osy oraıdaa kommýnaldyq-turmystyq sektor men halyqtyń otynǵa degen qajettiligi kómir arqyly qamtylǵan.
«Qazaqstandaǵy kómir qory 34 mlrd tonna nemese álemdik qordyń 4 paıyzy shamasynda. Elimiz kómir qory boıynsha álemdegi kóshbasshy on eldiń qatarynda. Kómir ónerkásibin damytý maqsatynda 2019 jyly «Qazaqstan Respýblıkasynyń kómir salasyn damytý jónindegi 2019-2021 jyldarǵa arnalǵan jol kartasy» ázirlenip, bekitildi», - delingen QR IIDM málimetinde.
Jol kartasynda salany damytýdyń júıeli sharalary, sondaı-aq jańa jobalardy iske asyrý qarastyrylǵan. Mysaly, «Shubarkól Kómir» AQ-da arnaıy koks óndirý boıynsha zaýyt salý, «Bogatyr», «Bogatyr Kómir» JShS-da kómirdi usaqtaý, tasymaldaý men tıeýdiń tsıkldyq-aǵymdyq tehnologııasyna kóshý syndy bastamalar qarastyrylǵan.
Halyqaralyq sarapshylar energetıkalyq naryqty damytý baǵytyndaǵy jumystarynda jahandyq energııa teńgerimindegi kómir úlesiniń tómendeýine qaramastan, álemdik naryqta otynnyń osy túrine degen suranys áli uzaq ýaqyt turaqty bolady degen pikirde.
Sonymen qatar, jol kartasy aıasynda halyqtyń kómir satyp alýy boıynsha tsıfrlyq platforma engizý qarastyrylǵan. Jobanyń oryndaýshysy – «Taý-ken óndirýshi jáne taý-ken metallýrgııa kásiporyndarynyń respýblıkalyq qaýymdastyǵy».
Byltyr qaýymdastyq ókilderi tsıfrlyq platforma arqyly kómir satý múmkindigin talqylaǵan keńes ótkizdi. Jıyn barysynda kommýnaldyq-turmystyq kómir jetkizetin kómir óndirýshi kompanııalar atalǵan platformany paıdalanýǵa múddeli ekenderin bildirdi. Bıyl qaýymdastyq kómirdi tsıfrlyq tuǵyrnamaǵa shyǵarý boıynsha synaq jumystaryn iske asyrýǵa nıetti.
Munymen qosa, jol kartasy aıasynda»Shubarkól Premıým» AQ-da kómir úlgilerin suıyq kómirsýtekti otyn qospasyna qaıta óńdeý boıynsha ǵylymı-zertteý jáne tájirıbelik jumystar júrgizý, sondaı-aq «Bogatyr Kómir» JShS-da elektr qýatyn tehnıkalyq esepke alýdyń avtomattandyrylǵan júıesin engizý jáne basqa da ınnovatsııalyq jobalar kózdelgen.
