Elimizdiń qalalarynda túrli jat áreketterdiń boı kórsetýiniń syry nede? - baspasózge sholý
***
«Keshe Memleket basshysynyń Qazaqstan halqyna Joldaýy jarııalanǵannan keıin Qazaqstan halqy Assambleıasynyń arnaıy keńesi ótti. Oǵan Assambleıadan saılanǵan Parlament Májilisiniń depýtattary, Assambleıa keńesiniń músheleri jáne respýblıkalyq etno-mádenı birlestikterdiń basshylary, Assambleıanyń ǵylymı-sarapshylyq keńesiniń músheleri qatysty», - dep jazady «Egemen Qazaqstan» gazeti senbilik sanyndaǵy «Ortaq maqsat, bir múdde» degen taqyryptaǵy maqalasynda. Keńes aıasynda sóz alǵan Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Toǵjanov Elbasynyń Joldaýdaǵy negizgi taqyryp - eń aldymen, el damýynyń naqty baǵytyn belgileý, onyń ishinde«Máńgilik El» týraly oı ekendigine toqtaldy. «Táýelsizdigimizdiń eń alǵashqy kúnderinen bastap aıtylyp júrgen, kún tártibinde turǵan suraqtardyń biri desek, artyq bolmaıdy dep oılaımyz. «Máńgilik El» - ol eń birinshiden, bizdiń táýelsizdigimizge baılanysty. Táýelsizdigimiz el birligimen baılanysty. Al el birligi qoǵamdyq kelisimmen baılanysty. Sondyqtan, Joldaýda kóterilgen máselelerdiń barlyǵy, onyń ishinde ekonomıkalyq, áleýmettik máseleler qoǵamdyq kelisimge baǵyttalǵan», - dedi ol.
«Egemen Qazaqstan» gazetiniń búgingi sanynda Memleket tarıhy ınstıtýtynyń eýrazııalyq jáne salystyrmaly saıası zertteýler bóliminiń basshysy, fılologııa ǵylymdarynyń doktory Madına Anafınovanyń «Ótken kúnde belgi bar» degen taqyryppen kólemdi maqalasy jarııalandy. «Sheteldik jáne elimizdegi mýzeılerde, kitaphanalarda, muraǵat ortalyqtarynda saqtaýly qoljazbalardyń, artefaktilerdiń, kitaptardyń, basqa da baspa, aýdıo jáne beınematerıaldardyń tolyq tizimin qalyptastyrý jumystary jańa serpin aldy desek qatelespeımiz. Bul - Táýelsizdik jyldary Qazaqstannyń tarıh ǵylymynyń jańa ólshemde - derbes qazaqstandyq tarıhı-ǵylymı jáne tarıhnamalyq keńistikte damı bastaǵanynyń kórinisi», - dep jazady maqala avtory.
***
«Aıqyn» gazetiniń senbilik sanynda fızıka-matematıka ǵylymdarynyń doktory, professor, QR UǴA akademıgi Muhtarbaı Ótelbaevpen aradaǵy suhbat «Men úshin ǵalymdyǵymnan ata dástúrim mańyzdy» degen taqyryppen berilgen. Basylym tilshisiniń barlyq saýalyna tuşymdy jaýap bergen ǵalym: «Kóp adam gýmanıtarlyq ǵylymnan góri, naqty ǵylymdardy damytý kerek degen pikir aıtyp júr. Men bul pikirge túbegeıli qarsymyn. Sebebi balalarǵa patrıottyq tárbıe berý úshin tarıh ǵylymy, sóz joq, kerek. Tipti tarıhqa erekshe kóńil bólý qajet. Al til bolmasa, ulttyń joıylatyny beseneden belgili. Sizbenen sóılesip otyrǵanymyzdyń ózi tilimizdiń arqasy emes pe, tilsiz adam maımyl, al maımylǵa matematıkanyń ne keregi bar? Menińshe, gýmanıtarlyq ǵylymdardy da, naqty ǵylymdardy da qatar damytý qajet. Tek durys baǵytpen... Gýmanıtarlyq ǵylymdardyń da, matematıkanyń da bolashaǵy bar bizdiń elde. Al tehnıka ǵylymdarynyń bolashaǵy kúńgirtteý sııaqty. Bul salany damytýdyń da qajeti joq. Sebebi bul salada bir jańalyq oılap tapsańyz, ol sol kúni-aq júz jerde tabylyp qoıǵan bolyp shyǵady. Sosyn ol jańalyqqa aqshasy barlar ǵana ıelik etedi. Sondyqtan da naqty ǵylymdarda damyp jatqan salany ǵana damytý kerek. Al qalǵandaryn shetelden satyp alyp, paıdalanýǵa bolady», - deıdi.
Sońǵy ýaqytta elimizdiń qalalarynda túrli jat áreketter boı kórsetip otyr. Al osynyń syry nede? Bul saýalǵa «Aıqyn» gazetinde esimi elge tanymal birqatar azamat jaýap berýge tyrysqan. Máselen, qoǵam qaıratkeri Dos Kóshimniń paıymynsha, qoǵamda túrli jat áreketterdiń boı kórsete bastaýyn eki túrli jolmen túsindirýge bolatyn sııaqty. Birinshisi - elikteý. «Ekinshi bir másele, bul óz aıtqanyn bılik tyńdamaıtyn, qoǵam nazar aýdarmaıtyn bolǵan soń osyndaı oqys áreket jasaý arqyly jurttyń nazaryn ózine aýdarý», - dedi ol. Al saıasattanýshy Ázimbaı Ǵalı: «Qalaı desek te, biz demokratııalyq qoǵamda ómir súrip jatyrmyz. Sondyqtan lıberaldyq qoǵamnyń boıaýy bizde qalyńdap keledi. Ony jat, oǵash áreketterden kórýge bolady. Túrli pıar, sherýler, aktsııalar ótkizýge bolady. Onda saıası, nemese áleýmettik maqsat, tipti jeke adamnyń ózin ózge jurtqa tanytý úshin jasaǵan pıary bolýy da múmkin. Biraq bári zań aıasynda bolǵany jón. Zańǵa qaıshy bolsa jazalanýy tıis», - deıdi.
