Elimizdegi 73 kásiporynnyń 1,4 mlrd teńge jalaqy bereshegi bar - komıtet

ASTANA. QazAqparat – Respýblıka boıynsha 73 kásiporynda 3 009 jumyskerdiń aldynda ótelmegen 1,4 mlrd teńge jalaqy bereshegi bar. Ortalyq kommýnıkatsııalar qyzmetindegi brıfıngide Eńbek jáne áleýmettik qorǵaý komıtetiniń tóraǵasy Tólegen Ospanqulov osylaı málim etti, dep habarlaıdy QazAqparat tilshisi.

«24 naýryzdaǵy málimet negizinde respýblıka boıynsha 73 kásiporynda 3 009 jumyskerdiń aldynda 1,4 mlrd teńge somasynda jalaqy boıynsha bereshek bar. Onyń ishinde aǵymdaǵy jáne merzimi ótken 31 kásiporynda 652,4 mln teńge, 42 bankrot jáne ońaltý satysyndaǵy kásiporyndarda 669 jumysker aldynda 728,1 mln teńge bereshegi bar», - dep málim etti Tólegen Ospanqulov.

Jumyskerler aldyndaǵy eń kóp bereshek Mańǵystaý oblysynda (242 mln teńge), Almaty qalasynda (235 mln teńge) jáne Abaı oblysynda (140 mln teńge) anyqtalǵan.

«Aǵymdaǵy jyldyń basynan bastap memlekettik eńbek ınspektorlary respýblıkanyń 241 kásipornynda 1,9 mlrd teńgeden astam somaǵa bereshek anyqtady. Osy kásiporyndardyń basshylaryna 241 uıǵarym berilip, 31,6 mln teńge somasynda ákimshilik aıyppul salyndy. Qabyldanǵan sharalardyń nátıjesinde 1,3 mlrd teńgeden astam bereshegi tólengen 8,1 myńnan astam jumyskerdiń quqyqtary qorǵaldy», - dedi komıtet tóraǵasy.