Elimizdegi 40 ózen-kólde sý sapasy nashar bolyp shyqty

ASTANA. QazAqparat – Elimizdegi 130 sý nysany, onyń ishinde 84 ózen, 29 kól, 13 sý qoımasy, 3 kanal jáne 1 teńiz sýynyń sapasy tekserildi. Nátıjesi 40 sý nysanynda sapa eń tómengi sanatqa jatqyzylǵan, sonyń 33-inde lastaný deńgeıi óte joǵary boldy. Atalǵan másele týraly senator Amangeldi Tolamısov depýtattyq saýalynda baıandady, dep habarlaıdy QazAqparat tilshisi.

Depýtattyń aıtýynsha, mamandar anyqtap otyrǵan lastanýdyń basty sebepteriniń biri – tazartylmaǵan sýdyń ózen-kólderge aǵýy. Bul baǵytta talapty buzyp otyrǵandar qatarynda ónerkásipte, turǵyn úı-kommýnaldyq sharýashylyq jáne aýyl sharýashylyǵynda qoldanylatyn hımııalyq zattar men basqalary bar.

«Byltyr Almatydaǵy «Altyn orda» bazary aýmaǵynda «Altyn Orda Qaz Trade Ltd» JShS-ny tekserý barysynda sharýashylyq-turmystyq qajetke paıdalanylatyn sý tartý qurylǵysy tabylǵany belgili. Sý qoryn paıdalaný jáne qorǵaý salasyndaǵy ýákiletti organ bazarǵa arnaıy sý paıdalanýǵa ruqsat bermegeni jaıly aqparat anyqtaldy. Tipti, sý kólemin ólsheý jabdyqtary da joq bolyp shyqqan. Al sanepıdqadaǵalaý mamandary bazar aýmaǵynan las sý Aqsaı ózenine tógilip kelgendigin de sol kezde ǵana anyqtaǵan. Mine, osyndaı nysandardyń elimizde joq ekenine kim kepil?», - dedi A. Tolamısov Úkimet basshysy Álıhan Smaıylovtyń atyna joldaǵan saýalynda.

Depýtat sý resýrstaryn tıimdi paıdalaný úshin qadaǵalaý organdarynyń jumysyn zańnamalyq turǵyda retteýdi, osy olqylyqtar men zań buzý derekterin turaqty tekserýler arqyly anyqtaýdy usyndy.

Senator jergilikti aýmaqtardaǵy sý resýrstaryn paıdalanýǵa memlekettik baqylaý is júzinde júrgizilmeıtinin atap ótti. Osyǵan baılanysty ol Mınıstrler kabınetiniń basshysyna birqatar usynystar aıtty.

«Sý resýrstary komıtetiniń jáne onyń Sý qoryn paıdalanýdy retteý jáne qorǵaý jónindegi basseındik ınspektsııalarynyń shtat sanyn ulǵaıtý kerek. Sý resýrstaryn paıdalaný kezinde jeke jáne zańdy tulǵalardyń jaýapkershilik deńgeıin arttyrý úshin sý qoryn paıdalaný jáne qorǵaý salasyndaǵy baqylaýdyń jańa normalaryn qarastyrý oryndy», - dedi depýtat.