Elimizdegi 2 JOO-ǵa zertteý ýnıversıteti mártebesi beriledi

NUR-SULTAN. QazAqparat – Elimizdegi 2 joǵary oqý ornyna zertteý ýnıversıteti mártebesi beriledi. Bul týraly búgin Úkimet otyrysynda Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat tilshisi.

«Zertteý ekojúıesin qalyptastyrý jáne serpindi tehnologııalardy damytý úshin 3 joǵary oqý ornyn zertteý JOO-larǵa aınaldyrý josparlanǵan. Bul - L.Gýmılev atyndaǵy EUÝ, ál-Farabı atyndaǵy QazUÝ, M. Áýezov atyndaǵy OQMÝ. Ál-Farabı atyndaǵy QazUÝ-ǵa zertteý ýnıversıteti mártebesi berildi», - dedi Saıasat Nurbek.

Onyń dereginshe, L.Gýmılev atyndaǵy EUÝ-di zertteý ýnıversıtetine transformatsııalaý boıynsha damý baǵdarlamasy men qaýly jobasy daıyndaldy. M.Áýezov atyndaǵy OQMÝ-dyń zertteý ýnıversıtetine aýysýy boıynsha jumystar júrgizilýde.

«Úzdiksiz bilim berýdi qamtamasyz etý maqsatynda ómir boıy oqytý tujyrymdamasy qabyldandy. Beıresmı bilimdi tanýdy qamtamasyz etý úshin biliktiliktiń Ulttyq sheńberin ózektendirý pysyqtalýda», - dedi ol.

Mınıstrdiń atap ótýinshe, akademııalyq utqyrlyq baǵdarlamasy iske asqan 10 jyldyń ishinde 17 000-nan astam qazaqstandyq stýdent sheteldik áriptes joǵary oqý oryndarynda bilim aldy. Osylaısha, 2022 jyldyń birinshi jartyjyldyǵynda osy baǵdarlama boıynsha oqýdan ótken stýdentter sany - 2 320 adamdy, 2021 jyly 3 246 adamdy qurady.