Elimizde JRVI jáne tumaý boıynsha epıdemıologııalyq jaǵdaı turaqty

ASTANA. QazAqparat - 2018 jylǵy 9 qarashadaǵy jaǵdaı boıynsha Qazaqstanda tumaý jaǵdaılary tirkelmegen, tumaý emes respıratorly vırýstardyń (paragrıpp, rınovırýs, adenovırýs jáne basqalar) aınalymda bolýy baıqalady, dep habarlaıdy QazAqparat QR DSM Qoǵamdyq densaýlyq saqtaý komıtetiniń baspasóz qyzmetine silteme jasap.

Epıdemıologııalyq maýsymnyń bastalǵaly beri (2018 jylǵy 1 qazannan bastap) JRVI-ǵa qatysty 58 myńnan astam jaǵdaı tirkelgen. Syrqattaný deńgeıi ótken jyldyń deńgeıinen 28 % tómen.

JRVI-men aýyrǵan adamdardyń negizgi bóligi 14 jasqa deıingi balalar (66 %).

Vaktsınatsııa naýqany bastalǵannan bastap tumaýǵa qarsy jalpy halyqtyń 10,6 %-y egildi, onyń ishinde 30 % - 14 jasqa deıingi balalar, 70 % - eresekter. Vaktsınatsııadan keıingi asqyný tirkelmegen.

Tumaý jáne JRVI profılaktıkasy aǵzanyń ózindik qorǵanysh kúshin nyǵaıtýǵa baǵyttalǵan jáne vaktsınatsııamen qatar júrgiziledi.

Spetsıfıkalyq emes qorǵanysh retinde ımmýnıtetti jaqsartý preparattary (anaferon, ınterferon, vıferon, ınterferon ındýktory), vırýsqa qarsy jaqpamaılar (oksalın, antıvır jáne t.b.), polıvıtamınder qoldanylady.

Sondaı-aq, JRVI-men aýyratyn adamdarmen qarym-qatynasta bolmaý, naýqas adamdarmen qarym-qatynasta bolǵan kezde betperde kııý, qoldy sabynmen nemese antıbakterıaldyq zattarmen (quramynda spırt eritindisi bar) jýý, jótelgende jáne túshkirgende bir ret paıdalanylatyn oramal nemese sýlyqtardy paıdalanyp, muryn jáne aýyzdy jabý, kózdi, muryn jáne aýyzdy las qolmen ustamaý, adamdar kóp jınalatyn oryndarǵa barýdy shekteý (oıyn-saýyq jáne sport is-sharalary, jınalystar, kezdesýler  jáne t.b.), úı-jaıdy turaqty jeldetý, salaýatty ómir saltyn ustaný (jaqsy  uıqy, taza aýa, belsendi demalys, dárýmenderge baı qunarly tamaq) qajet.

Tamaqty salqyn sýmen shaıýdan bastap kontrasty sebezgi jáne basseınge barý arqyly aǵzany shynyqtyrý qajet.

Naýqas adam úıde bolǵan jaǵdaıda ony oqshaýlap, naýqas jáne saý adamdar da betperdeni paıdalanýy qajet.

Qoǵamdyq kólikte, dárigerge kezekte turǵanda ınfektsııanyń taralýyn boldyrmaý úshin dárigerdi úıge shaqyrtqan jón.