Elimizde jemshópti arzan baǵada satatyn kooperatıv qurylady

ASTANA. QazAqparat – Aýyl sharýashylyǵy salasynda jańa kooperatıv qurylady. Onyń maqsaty – tórt túlik maldy arzan jemshóppen qamtamasyz etý. Bul týraly Aýyl sharýashylyǵy mınıstriniń mindetin atqarýshy Erbol Qarashókeev málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha aýyl halqynyń tabysyn arttyrý jónindegi «Aýyl amanaty» jobasyn iske asyrý bastaldy. Onyń sheńberinde senim bildirilgen ókil (agent) arqyly 5 jylǵa deıin, mal sharýashylyǵy salasynda 7 jyl merzimmen, jyldyq mólsherlemesi 2,5 paıyzben mıkrokredıt beriledi. Mıkrokredıttiń eń joǵary somasy - 8,6 mln teńge, al aýyl sharýashylyǵy kooperatıvteri úshin - 27,6 mln teńge. Jobany iske asyrýda bıyl 17 myń mıkrokredıt berý josparymen 100 mlrd teńge kózdelgen, bul 18 myńnan astam jańa jumys ornyn qurýǵa múmkindik beredi», - dedi Erbol Qarashókeev Úkimet otyrysynda.

Onyń málimetinshe, «Aýyl amanaty» jobasyna aldaǵy 7 jyl ishinde 1 trln teńge bólý josparlanyp otyr.

Sol arqyly 1 mıllıonnan astam aýyl turǵyny úshin 350 myńǵa jýyq jumys orny qurylmaq.

«Tórt túlik maldy azyqpen qamtý maqsatynda naryq baǵasynan tómen baǵada satatyn servıstik aýyl sharýashylyǵy kooperatıvterin qurý josparlanǵan», - deıdi ol.

Buǵan deıin E. Qarashókeev áleýmettik mańyzy bar azyq-túlik baǵasyn turaqtandyrýǵa jeńildetilgen nesıe beriletinin habarlaǵan edi.