Elimizde ýnıversıtetterdi akkredıtteýdiń biryńǵaı standarty engizilmek

ASTANA. QazAqparat – Qazaqstanda joǵary oqý oryndaryn akkredıtteýdiń biryńǵaı standartyn ázirleý josparlanýda. Muny BAQ ókilderiniń qatysýymen ótken brıfıngide Ǵylym jáne joǵary bilim vıtse-mınıstri Qýanysh Erǵalıev málim etti, dep habarlaıdy QazAqparat tilshisi.

«Qazir sapany qamtamasyz etetin júıeni engizý mańzdy. Osyǵan baılanysty búgingi tańda «taza paraqtan» jobasy aıasynda joǵary bilim berý salasyndaǵy 67 normatıvtik-quqyqtyq aktilerdi qaıta qaraý jumystary júrgizilýde. Bilim berý baǵdarlamalarynyń tizimin, akkredıtteý organdarynyń, akkredıttelgen ýnıversıtetterdiń jáne bilim berý baǵdarlamalarynyń tizimderi men reıtıngilik kórsetkishterdi biriktirý josparlanýda.

Endi joǵary bilim sapasyn qamtamasyz etý boıynsha nusqaýlyqty, onyń ishinde, joǵary oqý oryndaryn akkredıtteýdiń biryńǵaı standartyn ázirleý josparlanýda. Bilim berý baǵdarlamalarynyń sapasyn anyqtaıtyn quraly retinde «Atameken» UKP reıtıngisi qoldanylady. Osy aıdyń sońynda nátıjeler shyǵady. Reıtıng ýnıversıtetterdiń áleýetin jáne olardyń básekege qabilettiligin obektıvti turǵydan qaraýǵa múmkindik beredi», - dedi vıtse-mınıstr.

Sondaı-aq, ol Qonaev qalasynda arnaıy akademııalyq qalashyq qurý máselesi pysyqtalyp jatqanyn atap ótti. Buǵan qosa, atalǵan shaharǵa Almatyda ornalasqan keıbir ýnıversıtetterdi kóshirý múmkindigi qarastyrylady.