Elimizde transplantatsııany kútý tiziminde qansha bala tur
Senatordyń aıtýynsha, mundaǵy kezek óte baıaý ári operatsııany kútetin patsıentterdiń sany artyp keledi.
Aqmaral Álnazarova Qazaqstanda 2012 jyldan bastap organdardy aýystyrý boıynsha 2 myńǵa jýyq operatsııa jasalǵany týraly derekti keltirdi. Búgingi tańda transplantatsııany kútý tiziminde 3 300-den astam adam bar, onyń 105-i bala bolyp otyr. Sondaı-aq, sońǵy 9 jylda elimizde balalarǵa 118 búırek transplantatsııasy jasaldy, onyń 77%-y donor týystardan alynǵan.
Senator transplantologııalyq qyzmetti tolyqqandy qalyptastyrý úshin jaǵdaı jasaý, sondaı-aq halyqtyń organ donorlyǵy týraly habardarlyǵyn arttyrý boıynsha jumys júrgizý qajettigin atap ótti.
«Sonymen qatar, elimizde transplantologııanyń damýyn tejeıtin negizgi sebepterge qoldanystaǵy normatıvtik-quqyqtyq bazanyń jetilmegendigi, donorlyq statsıonarlardyń materıaldyq-tehnıkalyq bazasynyń tómendigi, sondaı-aq medıtsına qyzmetkerleriniń quqyqtyq turǵyda qorǵalmaǵany jatady», - dedi Aqmaral Álnazarova Senattyń jalpy otyrysynda.
Senator sonymen qatar donorlyq organdar men transplantatsııa brıgadalaryn óńirlerden ortalyqqa ýaqtyly jáne qaýipsiz jetkizýdiń tehnıkalyq qıyndyqtary bar ekenin atap ótti.
