Elimizde teńgemen depozıt ashatyndar sany ósti

ASTANA. QazAqparat - Bıyl ulttyq valıýtadaǵy depozıtterdiń ósimi 4,1 paıyzdy qurady. Bul týraly búgin Parlament Májilisiniń jalpy otyrysynda Ulttyq bank tóraǵasy Danııar Aqyshev málim etti, dep habarlaıdy QazAqparat.

«Aǵymdaǵy jyldyń 8 aıynda depozıtter 1 paıyzǵa, ıaǵnı 17,7 trln teńgege deıin ósti. Ulttyq valıýtadaǵy depozıtterdiń ósimi 4,1 paıyzdy nemese 380 mlrd teńgeni qurady. Shetel valıýtasyndaǵy depozıtter 2,5 paıyzǵa, 210 mlrd teńgege tómendedi. Nátıjesinde, depozıtterdiń dollarlandyrýy 46 paıyzǵa azaıdy», - dedi Ulttyq bank tóraǵasy.

Onyń atap ótýinshe, 1 qazannan bastap jeke tulǵalardyń depozıtteri boıynsha maksımaldyq stavkalardyń anyqtaý tásili ózgerdi. Stavkalar merzim jáne salym túri boıynsha erekshelenedi.

Aıta keteıik, jalpy otyrysta  «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasy talqylanyp jatyr. Bıylǵy jyly ınflıatsııa 5-7 paıyzdyq maqsatty dálizde qalady. 

Sonymen qatar, jyl basynan beri valıýta naryǵynda teńge baǵamy 10,4 paıyzǵa álsiregeni belgili boldy.