Elimizde rezervtegi áskerı qyzmetkerge jalaqy tólene me

NUR-SULTAN. QazAqparat – Elimizde rezervtegi áskerı qyzmetkerler mindetin óteý kezinde olar aılyq jalaqy ala ma? Bul suraqqa QR Qorǵanys mınıstrligi uıymdastyrý-jumyldyrý jumystary departamentiniń ókili, podpolkovnık Beıbit Súleımenov jaýap berdi, dep habarlaıdy QazAqparat tilshisi.

«Rezervtegi áskerı qyzmet sharasy respýblıkalyq bıýdjet esebinen júzege asyrylady. Ol qoldanystaǵy zańnamaǵa tıisti ózgerister men tolyqtyrý engizilgennen keıin qolǵa alynady. Jalpy rezervtegi áskerılerge zań aıasynda aı saıyn eń tómengi jalaqy tóleý josparlanyp otyr. Sondaı-aq, turaqty jumysy bar rezervtegi qyzmetker áskerı jıynda júrgen kezde oǵan ortasha eseppen jalaqy tóleý qarastyrylǵan», - dedi Beıbit Súleımenov mınıstrlikte ótken baspasóz máslıhatynda.

Onyń aıtýynsha, rezervtegi áskerı qyzmet kelisimshart negizinde júzege asady.

«Zań qabyldanǵannan keıin tıisti mamandyǵy bar azamattar áskerı bólimmen rezervte qyzmet ótkerý týraly 3 jylǵa tıisti kelisimshart jasaıdy. Rezervtegi adamdardy daıarlaý jylyna 60 kúnnen aspaıtyn merzimde júrgiziledi. Ol oqytý baǵdarlamasyna sáıkes uzaqtyǵy 1 aıǵa deıin aı saıynǵy eki kúndik sabaqtar men jıyndardan (oqý-jattyǵýlardan) turady», - deıdi ol.

Buǵan deıin mınıstrlik ókili elimizge rezervtegi áskerı qyzmettiń ne úshin kerektigin aıtyp bergen bolatyn.