Elimizde problemalyq kredıtter qorynyń jumysy ońtaılandyryldy
16 qarasha kúni Úkimet qaýlysymen «Problemalyq kredıtter qory» AQ men «Ońaltý jáne aktıvterdi basqarý kompanııasy» AQ qosý arqyly qaıta qurý sheshimi qabyldandy.
Qaıta uıymdastyrý sharalary negizinde qor - bankterdiń problemalyq aktıvterin satyp alý arqyly ulttyq ekonomıkany saýyqtyrýǵa járdemdesý, kredıtter boıynsha bereshekti óndirip alý jáne aktıvterdi basqarý jumystaryn júzege asyrýda.
«Memleket basshysynyń tapsyrmasyna sáıkes, qaıta qurý ekonomıkaǵa memlekettiń qatysýyn azaıtý boıynsha júrgizilip jatqan jumystar aıasynda bizdiń mınıstrlikke baǵynyshty uıymdardy ońtaılandyrýǵa septigin tıgizedi. Mundaǵy maqsat - qaıtalanatyn fýnktsııalardy boldyrmaý jáne shyǵyndardy azaıtý. Sonymen qatar, resýrstardy shoǵyrlandyrý esebinen qyzmet kórsetý sapasyn jaqsartý úshin baǵynyshty uıymdardyń birtekti aktıvterin biriktirýdi kózdeımiz», - dedi QR Qarjy vıtse-mınıstri Berik Sholpanqulov OKQ-de ótken baspasóz máslıhatynda.
Onyń aıtýynsha, biriktirý nátıjesinde problemalyq kredıtter qorynyń negizgi baǵyttary anyqtalady. Aldymen ekinshi deńgeıdegi bankterdiń jáne buryn bank bolǵan zańdy tulǵalardyń aktıvterin satyp alý arqyly bank sektorynyń jaǵdaıy jaqsartý kerek. Ekinshiden, satyp alynǵan aktıvterdi ekonomıkalyq aınalymǵa qosý, úshinshiden, bıýdjettik nesıelerdi, sondaı-aq, memlekettik kepildemelerdi oryndaý barysynda respýblıkalyq bıýdjetten jumsalǵan qarajattardy óndirý qajet. Sońǵysy - salalyq jáne kedendik tólemder boıynsha bereshekti jabý esebinen óndirilgen múlikti satyp alý.
«Birinshi baǵyt boıynsha 2017 jyldyń shildesinde 2,6 trln teńgege BTA aktıvteri satyp alyndy. Ol qarjy jumys oryndary men halyqtyń, zańdy tulǵalardyń jáne memlekettik kompanııalardyń depozıtterin saqtaýǵa, kredıt berýdiń tómendeýiniń aldyn alýǵa múmkindik berdi», - dedi vıtse-mınıstr.
Odan bólek, qor osy jyldyń tamyzynda Astana qalasynyń jańa kólik júıesi - LRT jobasyn odan ári iske asyrý úshin «Astana LRT» JShS aldyndaǵy bank qaryzyn óteý maqsatynda Astana bankiniń qaryz alýshylaryna talap etý quqyǵyn qorǵa berý boıynsha mámileni júzege asyrdy.
Vıtse-mınıstrdiń sózinshe, qos uıymdy biriktirý sharalary 2020 jylǵa deıin ekonomıkadaǵy memlekettiń úlesin EYDU (Ekonomıkalyq yntymaqtastyq jáne damý uıymy) elderindegideı JІÓ-niń 15%-na deıin tómendetý múmkindigin beredi.
Aıta ketsek, Ońaltý jáne aktıvterdi basqarý kompanııasy 1998 jyldan beri Dúnıejúzilik banktiń qarjy sektorynyń baǵdarlamasy sheńberinde respýblıkalyq bıýdjet esebinen bólingen kredıtterdi qaıtarýmen aınalysyp keledi.
