Elimizde munaı óndirisi qysqarady

ASTANA. QazAqparat – Jyl sońyna deıin elimizde munaı óndirisi kóleminiń azaıatyny boljanyp otyr, dep habarlaıdy QazAqparat tilshisi.

«Iá, biz munaı óndirýdiń josparly kólemin qysqarttyq. Ózderińiz biletindeı, biz 90,5 mıllıon tonna munaı óndirýimiz kerek edi. Bul jerde másele tek qana MAEK-tegi apattan emes. Ken oryndarynda josparly jáne jospardan tys jóndeý jumystary júrdi. Sondaı-aq jóndeý júrgizýdiń qosymsha kólemine baılanysty da máseleler týyndady. Osy oraıda qazir elektr energııasyn kúnine 12 myń tonnaǵa deıin shekteýge baılanysty biz jospardan aýytqyp otyrmyz. ıAǵnı elektr energııasyn jetkizýdegi shekteýlerge baılanysty táýliktik munaı óndirisi tómendedi», - dedi Energetıka mınıstri Almasadam Sátqalıev Úkimet otyrysynan keıin BAQ ókilderiniń saýalyna jaýap bere turyp.

Onyń aıtýynsha, jyl sońyna deıin munaı óndirisi 1,5-2 mıllıon tonnaǵa deıin tómendeýi boljanyp otyr.

«Jyl qorytyndysy boıynsha munaı óndirý shamamen 89,4 mıllıon tonna bolady dep josparlap otyrmyz. Biraq dınamıkany kóreıik, óıtkeni ken oryndarynda jóndeý jumystary jalǵasyp jatyr», - deıdi ol.