Elimizde kún saıyn 5 myńnan astam ulandyq qoǵam tynyshtyǵyn kúzetedi – podpolkovnık
Onyń aıtýynsha, kún saıyn elimizde 5 myńnan astam ulandyq jaýynger polıtsııa qyzmetkerlerimen birge 19 qalada qoǵamdyq qaýipsizdikti qadaǵalaıdy.
-Ermek Myqtybaıuly, aldymen Ulttyq ulannyń jaýyngerlik qyzmeti jóninde aıtyp ótseńiz?
-Jalpy, jaýyngerlik qyzmet uǵymynyń aıasy keń. Biz ishki ister organdarymen, basqa da kúshtik qurylymdarmen birlese otyryp, qoǵamnyń turaqtylyǵy men tynyshtyǵyn qamtamasyz etemiz. Jaýyngerlik qyzmet birneshe baǵytqa bólinedi. Mysaly, qylmystyq-atqarý júıesi mekemelerdi kúzetý, arnaıy jáne áskerı tasymaldaý, kınologııa qyzmeti jáne ózim qyzmet atqaratyn qoǵamdyq tártipti uıymdastyrýdy aıtýǵa bolady. Bir sózben keltirsek, jaýyngerlik qyzmet – áskerdiń dińgegi. Barlyq salaǵa jaýap bere almaımyn. Degenmen qoǵamdyq tártip týraly bir-eki aýyz sóz aıtyp óteıin. Ulttyq ulan ózi qurylǵannan beri 13 myńǵa jýyq qoǵamdyq-saıası jáne basqa buqaralyq is-sharalardy qamtamasyz etti. Atap aıtqanda, Besinshi Astana ekonomıkalyq forýmy, Álemdik jáne dástúrli dinder kóshbasshylarynyń sezi, 2010 jyly ótken Eýropadaǵy qaýipsizdik jáne yntymaqtastyq uıymynyń sammıti, 2011 jylǵy Azııa oıyndary, TMD elderi basshylary keńesiniń jáne Joǵary Eýrazııalyq ekonomıkalyq keńesiniń otyrystary. Sondaı-aq 2017 jyldyń aqpanynda Almaty qalasynda bolǵan 28-shi Búkilálemdik qysqy ýnıversıada kezinde ulan jaýyngerleri qyzmetterin abyroımen atqara bildi. Al, ekinshi erekshe shara – 2017 jyldyń úsh aı jazynda Astanada ótken mamandandyrylǵan «EKSPO-2017» halyqaralyq kórmesi. Oǵan álemniń 115 memleketinen jáne 22 halyqaralyq uıymnan delegatsııalar keldi. Osyndaı el ómirindegi eleýli oqıǵalarda Ulttyq ulannyń jaýyngerleri kúndiz-túni qaýipsizdikti qadaǵalap, tynyshtyq jolynda tynym tappaı qyzmet jasady. Ýnıversıada kezinde jeke quramnan 1200-deı jaýynger tartyldy. Al «EKSPO-2017» kórmesinde 1500 jaýynger qoǵamdyq tártipti qorǵady. Júıeli túrde júrgizilgen jumystar nátıjesiz emes. Oǵan sandar aıǵaq. Sońǵy jyldary kóshede bolatyn qylmys sany 40 paıyzǵa deıin azaıǵan. Sonymen qatar elimizde tótenshe jaǵdaı jarııalanǵanda, karantındik sharalardyń oryndalýyna atsalysty.
-Qyzmettik ıtter Ulttyq ulanda keńinen qoldanylyp keledi. Qylmyskerlerdi, esirtki men qarýdy izdeıdi. Tártip buzýshylardy ustaıdy. Joǵalǵan azamattardy tabýǵa kómektesedi. Kún saıyn quqyqtyq tártip áskerlerindegi qyzmettik-jaýyngerlik áreketke qatysady. Qoǵamdyq tártipti qamtamasyz etýde qyzmettik ıtterdiń paıdasy kóp pe?
Árıne, kóp. Bizde qoǵamdyq tártipti qorǵaýǵa qatysyp, úzdik nátıje kórsetken qyzmettik ıtter bar. Mysaly, 6697-áskerı bóliminiń jedel maqsattaǵy batalonynyń «Djek» degen qyzmettik ıti bar. Qoǵamdyq tártipti saqtaý jáne ishki ister organdaryna kómek kórsetý boıynsha qyzmet atqarý kezinde «Djek» joǵary nátıjeler kórsetti. «Qarasora» jedel aldyn alý is-sharasy barysynda ishki ister organdaryna kómek kórsetti. Qyzmettik ıt jalpy salmaǵy 76 gramm bolatyn, erekshe ıisi bar jasyl tústi ósimdik tektes zatty qaltasyna jasyrǵan azamatty anyqtap berdi. Sonymen birge 2021-2022 jyldar kezeńinde qoǵamdyq tártipti qorǵaý boıynsha qyzmet atqarý kezinde óte jaqsy nátıjeler kórsetken kókshetaýlyq «Malysh» atty qyzmettik ıt bar. Osy ýaqytqa deıin birde-bir tártip buzýshyny jibermedi. «Malyshtan» áli eshkim qashyp qutylǵan emes.
Birde Kókshetaýda áskerı jasaq kúdikti azamatty baıqaıdy. Áskerı jasaq er adamnan toqtaýdy suraıdy. Ol ulandyqtardyń aıtqanyna qulaq aspaı, birden qasha jóneledi. Patrýlshi-kınolog serjant D.Rahmetov «Toqta! Men qyzmettik ıtti qoldanamyn!» dep aıqaı salady. Qashqyn eskertýge jaýap bergen joq, sodan keıin tumyldyryqtaǵy «Malysh» qýa jóneledi. Qyzmettik ıt qashqyndy qýyp jetedi de, jerge qulatady. Patrýlshiler kelgenshe jibermeı, ustap turady. Ustalǵan azamat L.-dy tekserý barysynda onyń QR QK 188-baby 1-bóligi boıynsha izdestirilip jatqany anyqtaldy. Kúdikti Kókshetaý qalasynyń polıtsııa basqarmasyna jetkizildi.
-Prezıdent Qasym-Jomart Toqaevtyń Jarlyǵymen bıyl Balalar jyly bolyp jarııalanǵany belgili. Osyǵan oraı ne aıtar edińiz?
-Ulttyq ulan sarbazdary men ofıtserleri quqyqtyq tártipti saqtaýmen birge azamattarǵa balalary men basqa týystaryn tabýǵa járdemdesedi. Ótken jyly áskerı qyzmetshiler joǵalǵan 22 balany taýyp, jaqyndaryna qaıtardy. Kóbine balalar jazǵy ýaqytta jıi joǵalady. Qalalyq saıabaqtarda, mádenıet oryndarynda belsendi otbasylyq demalys kezinde osyndaı jaǵdaıǵa tap bolyp jatady. Balalar alańda qalyp qoıady, keıde júgirip ketedi. Ata-analar balasyn óz betinshe taba almaǵan soń tártip saqshylaryna júginedi. Áskerı jasaq árqashan jalǵyz júrgen balalarǵa nazar aýdarady. Ulandyq jaýyngerler olarmen amandasady, sóılesedi, kimmen júrgenin suraıdy. Balalar áskerı formadaǵy adamdarǵa senedi. Sondyqtan olar joǵalyp ketkenin jáne úıge jol taba almaı júrgenin jasyrmaı aıtady. Nátıjesinde biz dereý shara qoldanyp, balalardy jaqyndaryna qaıtaramyz.
-Sóz sońynda ózińiz jáne otbasyńyz týraly birer derek keltirseńiz?
-Men Soltústik Qazaqstan oblysynyń týmasymen. QR Ulttyq ulanynyń akademııasyn támamdap, vzvod komandırinen bastap jaýyngerlik qyzmet ofıtseri sekildi laýazymdardy barynsha jaýapkershilikpen atqaryp kelemin. Jarym Botagóz Jııanshaqyzy ekeýmiz Málıka, Sanjar esimdi ul-qyzymyzdy tárbıelep otyrmyz. Qysqasha aıtqanda, osy.
-Áńgimeńizge rahmet!
