Elimizde keıbir dárigerler zeınetke erte shyǵýy múmkin
«Farmatsevtterdiń zeınetke jeńildetilgen jolmen shyǵýy týraly: densaýlyq saqtaý júıesindegi jańa Kodekstiń zań jobasynyń tujyrymdamasynda áleýmettik mártebeni qorǵap, medıtsınalyq qyzmetkerlerdiń abyroıyn arttyrý úshin bekitilgen tizim boıynsha olar zeınetke erte shyǵatyndaı normany usynyp otyrmyz. Shynyna kelgende asa qaýipti óndiriste eńbek etetin jumysshylarǵa qatysty bizde tizim bar. Menińshe, ol tizimge 16 mamandyq kiredi. Biz osy tizimge mamandarymyzdy da kirgizgimiz keledi», - dedi spıker Ádilet mınıstrliginde ótken brıfıng barysynda.
Ol óz sózinde keıbir medıtsınalyq qyzmetkerler óte kúrdeli jaǵdaıda jumys júrgizip jatqanyn aıtady.
«Máselen, radıologtar, onkologtar sekildi jumystary kúrdeli birqatar jumys bar. Olarmen etene jumys atqaratyn memlekettik organdar bul usynysymyzdy qoldap otyr. Biz medıtsınalyq jáne farmatsevtıkalyq qyzmetkerler týraly budan buryn da aıtqan bolatynbyz. Medıtsınalyq dep jalpylaı alǵanda onyń ishine birqatar mamandyq enetinin atap ótkimiz keledi. Biz naqty ereje men tártipti ázirleımiz. Olardyń báride ýákiletti organdardyń tıisti qujattarynda aıqyndalady. Merzim, dárigerdiń jasy - bári de erejelerimizde kórsetiledi», - deıdi B.Tókejanov.
Kodekstiń tujyrymdamasynda jáne «Qazaqstan Respýblıkasynyń densaýlyq saqtaý salasyndaǵy máseleler boıynsha keıbir zańnamalyq aktilerge ózgerister men tolyqtyrýlar engizý týraly» zań jobasynda dárigerlerdiń mártebesin kóterý máselesi de qarastyrylǵan.
«Bul bizdiń tujyrymdamanyń jańa qyry. Biz Turǵyn úı qaty,nastary zańynda densaýlyq saqtaý salasynyń qyzmetkerlerine qatysty turǵyn úı qatynastaryn retteý erekshelikterine baılanysty belgili bir bólimdi qarastyrǵymyz keledi. Statıstıkaǵa qarap otyrsaq, bizde ishki mıgratsııanyń hali kóńil qýantpaıdy - kóptegen dárigerlerdi aq halattylarǵa muqtaj óńirlerge jibere almaı otyrmyz. «Dıplommen aýylǵa» baǵdarlamasy bar desek te, dál osy turǵyn úıge kelgende másele áli de sheshilgen joq. Jergilikti atqarýshy organdarydń jaýapkershiligi bar, biraq ókinishke qaraı bizdiń balalar medıtsınalyq ýnıversıtterge túsken kezde bılik ókilderi olardyń 9-10 jyl boıy oqıtynyn biledi. Ýnıversıt bitirip shyqqan stýdentter birshama jasqa taqap qalatynyn eskerý kerek. Mine, sol kezde olar jumysqa bilek sybana kirisip ketýi úshin áleýmettik jaǵdaıyn jaqsartýymyz kerek. Dárigerlerge salynǵan aqsha ózin-ózi aqtaıdy», - deıdi ol.
Sonymen qatar, Bolat Tókejanov kadrlardy aýylǵa ornalastyrý boıynsha zańnamalyq normalar baryn da eske saldy.