Elimizde «Dıplomatııanyń 26 jańa esimi» anyqtalmaq

ASTANA. QazAqparat - Qazaqstan Respýblıkasynyń Syrtqy ister mınıstrligi Qazaqstannyń dıplomatııalyq qyzmetiniń 26 jyldyǵyna oraı «Dıplomatııanyń 26 jańa esimi» atty aqparattyq jobany júzege asyra bastady. Bul týraly QazAqparat mınıstrliktiń baspasóz qyzmetine silteme jasap habarlaıdy.

Bul joba dıplomatııalyq qyzmettiń jas qyzmetkerlerin yntalandyrý men dıplomat mamandyǵynyń bedelin odan ári nyǵaıtýdy kózdeıdi.

2 shildede atalyp ótetin Dıplomatııalyq qyzmet kúni qarsańynda «Feısbýk» áleýmettik jelisinde QR SІM-niń resmı paraqshasynda Qazaqstannyń sheteldik mekemelerinde jáne vedomstvonyń ortalyq apparatynda qyzmet isteıtin keleshegi bar jas dıplomattar týraly aqparat ornalastyrylady.

«Dıplomatııanyń 26 jańa esimi» jobasy Memleket basshysy Nursultan Nazarbaev jarııalaǵan «Rýhanı janǵyrý» baǵdarlamasy aıasyndaǵy «100 jańa esim» jalpyulttyq jobasyn qoldaý aıasynda iske asyrylady. Joba qazaqstandyq qoǵam úshin dıplomattardyń qyzmetteri týraly kóbirek aqparat alýǵa múmkindik beredi dep senemiz», - delingen taratylǵan habarlamada.