Elimizde dástúrli medıtsınanyń qaı túrleri lıtsenzııalanǵan

ASTANA. QazAqparat – Medıtsına bir orynda turmaı, damyp jatqany belgili. Kúrdeli aýrýlardy emdeýdiń zamanaýı tehnologııalary engizilip keledi. Degenmen, emdeýdiń halyqtyq ádisteri, ıaǵnı dástúrli medıtsınaǵa senetinder de jeterlik. Osy oraıda, QazAqparat tilshisi Densaýlyq saqtaý mınıstrligine saýal joldap, dástúrli medıtsınany lıtsenzııalaý máselesin kótergen edi. Sonyń ishinde hıdjama týraly da jaýap aldy.

«Qazaqstannyń densaýlyq saqtaý júıesinde klınıkalyq hattamalarǵa, medıtsınalyq kómek kórsetýdi uıymdastyrý standarttaryna negizdelgen medıtsına resmı dep tanylady. Dástúrli medıtsına – ǵasyrlar boıǵy dástúrlerge negizdelip, medıtsınalyq qoldanýǵa ruqsat etilgen profılaktıka, dıagnostıka, emdeý jáne ońaltý ádisteriniń jıyntyǵy. Qazaqstan Respýblıkasynyń zańnamasynda dástúrli medıtsınanyń naqty túrleri boıynsha medıtsınalyq qyzmet kórsetýde lıtsenzııanyń bolýy mindetteledi. Oǵan gomeopatııa, gırýdoterapııa, manýaldy terapııa, refleksoterapııa, shóp medıtsınasy jáne tabıǵı dári-dármektermen emdeý jatady. Osylaısha, dástúrli terapııany qosa alǵanda, medıtsınalyq qyzmetti naqty mamandyq boıynsha sertıfıkaty bar medıtsına qyzmetkerleri ǵana júzege asyrýǵa quqyly», - delingen mınıstrlik jaýabynda.

Sondaı-aq, mınıstrlik azamattardyń halyq emshileri qyzmetine júginetinin rastap otyr.

«Alaıda, halyq emshiligi medıtsınalyq qyzmet emes jáne onyń kesirinen densaýlyqqa zııan kelgen jaǵdaıda qylmystyq jaýapkershilik qarastyrylǵan. Mysaly, halyq emderiniń bir túri – hıdjama (qan shyǵarý). Ol medıtsınalyq tehnologııa emes jáne juqpaly aýrýlardyń, onyń ishinde AITV, vırýstyq gepatıtter men basqa da dertterdiń taralý qaýpi bar, ıaǵnı zańsyz qyzmet», - dep túsindirdi vedomstvodan.

«Halyq densaýlyǵy jáne densaýlyq saqtaý júıesi týraly» Kodekste «Dástúrli medıtsına. Emdeý» deıtin arnaıy bap bar. Bul degenimiz – dástúrli medıtsınanyń ǵasyrlar boıǵy tájirıbesine negizdelgen aldyn alý, dıagnostıka, emdeý jáne ońaltý ádisteri.

«Búginde emshiler dástúrli medıtsınamen daıyndyǵy jáne qosymsha bilimi bolmasa da aınalysa alady. Bul kóbine aýrýdyń asqynýyna alyp keledi. Aqyrynda patsıentterdiń densaýlyǵyna teris áser etedi», - deıdi Densaýlyq saqtaý mınıstrliginen.