Elimizde ataýly áleýmettik kómektiń mólsheri ózgere me

NUR-SULTAN. QazAqparat - Eńbek jáne halyqty áleýmettik qorǵaý mınıstri Berdibek Saparbaev elimizde turmysy tómen otbasylarǵa beriletin ataýly áleýmettik kómektiń mólsherin ósirý máselesine qatysty suraqqa jaýap berdi, dep habarlaıdy QazAqparat.

«Qandaı áleýmettik kómekterdiń kórsetiletini jóninde kópten beri aıtylyp kele jatyr. Al endi qosymsha áleýmettik kómekter týraly aıtyp óteıin: eń birinshiden, bári tabysqa baılanysty bolady. Qazir biz tabysty eseptegen kezdegi jeńildikterdi qarastyryp jatyrmyz. Bıyldan bastap jeńildikterdiń tórt túrin alyp tastaǵanymyzdy bilesizder. Búgingi kúni memlekettik organdarmen birge, ásirese jeke qojalyqtaryna, eginine, malyna alatyn járdemaqylaryna baılanysty esepteý jumystary júrgizilýde. Jaqyn arada sheshim qabyldanady», - deıdi mınıstr.

Berdibek Saparbaev óz sózinde az qamtylǵan otbasylarǵa qosymsha kómek jergilikti bılik arqyly kórsetiletinin atap ótti.

«Qazirgi ýaqytta jergilikti bılik tarapynan kórsetiletin kómektiń 11 túri bar. Odan keıingisi - sol jerdegi kásipkerler men kásiporyndar arqyly kórsetiledi. Aqparat quraldarynda qazirgi ýaqytta ataýly áleýmettik kómektiń mólsherin arttyrý máselesi kóterilip júr. Keıbireýler barlyq balalarǵa 42 myń teńgeden berýimiz kerek deıdi. Bizdiń elimizde 3 mıllıonǵa jýyq bala bar. Eger olardyń barlyǵyna 42 myń teńgeden berer bolsaq, oǵan qosymsha qazirgi berilip otyrǵan aqshadan basqa 3,5 trıllıon qarjy kerek», - deıdi Berdibek Saparbaev.

Vedomstvo basshysy halyqtyń kásip ashýyna kómektesý kerektigin aıtyp ótti.

«On eki múshesi saý adamdar jumys isteýi kerek. Al bıliktiń mindeti - soǵan jaǵdaı jasaý. Grant pen mıkronesıe sol úshin berilgeli jatyr. Máselen, bir áıel úıinde otyryp, tigin tigip, tamaqtyń túr-túrin ázirleı alýy múmkin. Tigin máshinesi kóp bolsa, 300-400 myń teńge. Oǵan kómektesý kerek. Tamaq isteıtin qurylǵylardyń da baǵasy sondaı. Al ataýly áleýmettik kómek jóninde shýlar basynda boldy. Óıtkeni, árbir jańalyq engen kezde suraq kóp bolady. Áleýmettik jelidegi ol shýlar basyldy. Negizgi túsinbeýshilik - tabysty esepteýde. Ásirese, maly men eginine baılanysty áńgimelerdi bilesizder. Tipti jıhaz eseptelipti dep jatyr. Jıhazdy eseptemeý kerek. Negizinen biz «úıge barýdyń keregi joq» dep tapsyrma berdik. Óıtkeni, árbir qala túgili, aýyldardaǵy turǵyndar boıynsha málimetterdiń bári bar. Kóp kóterilgen suraq - taýyq, jumyrtqa degen sekildi áńgimeler. Olardyń bárin eseptelmeýi kerek dedik. Almasy, shıesi, qulpynaıy eseptelmeýi kerek», - deıdi Berdibek Saparbaev.

Mınıstr óz sózinde otbasynyń tabysyn anyqtaý kerektigin atap ótti.

«Biz jergilikti bılikke tıisti tapsyrma berdik. Keıbireýler AÁK taǵaıyndaý kezinde otbasylardyń tabysyn eseptemeý kerek deıdi. Olaı bolmaıdy. Masyldyq bolmaýy tıis. Tabys mindetti túrde esepteledi. Eger biz qazir tabystyń bárin alyp tastaıtyn bolsaq, onda AÁK úshin bólingeli otyrǵan 330 mlrd teńgege qosymsha 500 mlrd teńge kerek bolady. Eń negizgisi - biz barlyq baladan bastap úlken kisige deıin eńbek etýge úıretýimiz kerek», - deıdi Berdibek Saparbaev.

Aıta ketsek, Úkimettiń baspasóz ortalyǵynda 160 myń otbasyǵa ataýly áleýmettik kómek taǵaıyndalǵanyn málim etken bolatyn. Onyń aıtýynsha, ol shamamen - 806 myńdaı halyq. Berilgen talaptarǵa saı kelmegendikten, 10 myń otbasyǵa AÁK taǵaıyndalmaǵan.