Elimizde áskerı dárigerlerdi daıarlaý qalaı júrip jatyr
- Áskerı dárigerlerdi qaı jerde, qandaı joǵary oqý oryndary daıarlap jatyr? Shetelde oqytý tájirıbesi bar ma?
- Qazirgi kezde Qazaqstannyń qarýly kúshterinde áskerı medıtsınalyq mamandarǵa suranys óte joǵary dep aıtýǵa bolady. Áskerı dárigerlerdi daıarlaý Aqtóbe qalasyndaǵy áýe qorǵanysy kúshteri Áskerı ınstıtýtynyń bazasynda Batys Qazaqstan medıtsına ýnıversıtetimen birlese otyryp júzege asyrylady. Bolashaq áskerı dárigerler beıindi medıtsınalyq bilimdi medıtsına ýnıversıtetinde, al áskerı bilimdi áskerı ınstıtýtta alady. Al shetelde oqý máselesine keletin bolsaq, bizdiń kýrsanttarymyzdy Sankt-Peterbýrgtegi S.Kırov atyndaǵy áskerı-medıtsınalyq akademııaǵa, sondaı-aq Erevan medıtsınalyq ýnıversıtetiniń áskerı-medıtsınalyq fakýltetine daıarlaýǵa jiberip otyramyz.
- Bıyl áskerı dáriger mamandyǵyna qansha kýrsantty qabyldaý josparlanyp otyr?
- Bıyl oqýǵa 40 kýrsant qabyldaýdy josparlap otyrmyz. Onyń 25-i – áýe qorǵanysy kúshteri áskerı ınstıtýtyna qabyldansa, 10 kýrsantty Reseıge jáne 5-in Erevanǵa jiberemiz dep otyrmyz.
- Al qyzdar arasynda oqytýǵa irikteý bola ma?
- Árıne, áskerı dáriger bolýǵa nıet bildirgen qyzdardy shetelde ǵana daıyndaımyz. Ol men aıtyp ótken Sant-Peterbýrgtegi nemese Erevandaǵy áskerı mekemelerge oqýǵa qujattaryn tapsyrýǵa múmkindikteri bar.
- Bolashaq áskerı dárigerlerdi oqýǵa qabyldaýda qandaı talaptar qoıylady?
- Jalpy áskerı oqý oryndaryna túsýge qoıylatyn talaptarmen birdeı. Atap aıtqanda, Qazaqstan Respýblıkasynyń azamaty, sottalmaǵan bolýy kerek, qupııa málimettermen jumys isteýge eshqandaı qarama-qaıshylyqtary bolmaýy tıis. Bolashaq kýrsanttyń densaýlyq jaǵdaıy, psıhologııalyq jáne dene daıyndyǵy, ulttyq biryńǵaı testileý nátıjeleri de mańyzdy. ÁOO-nyń qabyldaý komıssııasyna usynylatyn qujattardyń tolyq tizbesimen jastar turǵylyqty jeri boıynsha jergilikti áskerı basqarý organdarynda tanysa alady.
- Bilim alýshylar úshin qandaı basymdyqtar qarastyrylǵan?
- Kýrsanttar tegin oqıdy, jatatyn oryn, úsh mezgil tamaq, kıim-keshek tegin beriledi. Odan bólek, tegin medıtsınalyq kómek qarastyrylǵan. Bakalavrıatta oqýdy aıaqtaǵannan keıin kýrsanttar áskerı ıntern laýazymyna taǵaıyndala otyryp, «medıtsına qyzmetiniń leıtenanty» áskerı ataǵy beriledi. Internatýrada oqý kezinde olarǵa aqshalaı úles, ıaǵnı jalaqy tólenedi. Jalpy jalaqynyń mólsheri búgingi kúnde 220 myń teńgeni quraıdy. Azamattyq ýnıversıtette oqıtyndar stependııa alyp júrse, olar jalaqy alady, sodan keıin olar oqýdy bitirgende jumyspen qamtylady. Eń bastysy, barlyq túlekterdiń mansaptyq ósýine múmkindikteri bar.
- Medıtsınalyq mamandyqtary bar zapastaǵy ofıtserlerdi shaqyrý úshin shekti jasty ulǵaıtý boıynsha zańǵa ózgerister engizý usynyldy. Bul ózgerister ne úshin qajet?
- Qazirgi qabyldanyp jatqan zańda, medıtsınalyq mamandyǵy bar azamattar úshin shaqyrý jasyn 29-dan 32 jasqa deıin ulǵaıtyldy. Osy zańmen nekede turǵan jáne bir jáne odan da kóp balasy bar zapastaǵy ofıtserlerge eki jylǵa áskerge shaqyrýdy keıinge qaldyrý alynyp tastalady. Bul zańnamalyq sharalar áskerı-medıtsınalyq bólimshelerdi dáriger kadrlarmen jasaqtaý máselesin sheshedi degen úmitimiz bar.
- Qazirgi ýaqytta áskerı dáriger bolý bedeldi me?
- Bul baǵytqa aıtarlyqtaı nazar aýdarylýda. Áskerı dárigerlerdiń bedelin arttyrýda birqatar sharalar qabyldap jatyrmyz. Sondyqtan áskermen, áskerı medıtsınamen óziniń ómirin baılanystyratyn adamdar kóbeıedi degen úmittemiz.
Suhbatyńyzǵa rahmet!
