Elimizde 121 órt sóndirý deposyn salý qajet - TJM

ASTANA. QazAqparat – Halyq sany 10 myń adamnan asatyn 188 eldi mekenniń tek 150-de memlekettik órtke qarsy qyzmet bar. Bul týraly «Azamattyq qorǵaý salasyndaǵy 2023-2027 jyldarǵa arnalǵan birinshi kezektegi sharalardyń keshendi josparynda» jazylǵan, dep habarlaıdy QazAqparat tilshisi.

«El aýmaǵyn órtten qorǵaýdy TJM-niń 422 órt sóndirý deposy júzege asyrady. Onyń ishinde 130 órt sóndirý deposy jańǵyrtýdy talap etedi. 317 eldi meken órtten qorǵaýmen qamtamasyz etildi, qosymsha 121 órt sóndirý deposyn salý qajet.

Halyq sany 10 myń adamnan asatyn 188 eldi mekenniń tek 150-inde ǵana memlekettik órtke qarsy qyzmet bar. Al, turǵyn sany 5-ten 10 myń adamǵa deıingi 195 aýyldyq eldi mekenniń 85-inde memlekettik órtke qarsy qyzmet joq», - delingen keshendi josparda.

Qosa ketsek, vedomstvo dereginshe, 1970 jyldary shyǵarylǵan 500-ge jýyq eski órt tehnıkasy áli qoldanysta júr. Sonymen qatar, jumys istep turǵan 63 seısmıkalyq stantsııanyń jabdyqtary tozǵan.