Elimizde 100-den asa adam qurmetti donor ataǵyn aldy

NUR-SULTAN. QazAqparat – Jyl saıyn bizde shamamen 80 myńǵa jýyq naýqasqa qan quıylady. Bul týraly QR Densaýlyq saqtaý mınıstrligi Medıtsınalyq kómekti uıymdastyrý departamenti Ambýlatorııalyq-emhanalyq jáne jedel medıtsınalyq kómek basqarmasynyń basshysy Batyrhan Sarymsaqov málim etti, dep habarlaıdy QazAqparat tilshisi.

«Qazirgi kezde Qazaqstanda qan quıý salasynda jumys isteıtin 470-ke jýyq medıtsına uıymy bar. Jyl saıyn bizde shamamen 80 myńǵa jýyq naýqasqa qan quıylady. Olarǵa 400 myńǵa jýyq qan quıý protsedýrasy júrgiziledi. Elimizde medıtsına uıymdary 100 paıyz qan jáne onyń komponentterimen qamtamasyz etiledi. Kóbine qan komponentteri akýsherlik tájirıbede, onko-gematologııada, hırýrgııada jáne travmatologııada paıdalanylady», - dedi B. Sarymsaqov Ortalyq kommýnıkatsııalar qyzmetinde.

Osy oraıda ol qan quıý kúrdeli protsess ekenin, qan ortalyqtaryna 300-ge jýyq dáriger tartylatynyn aıtty.

«Bul sala memlekettiń qoldaýynsyz óziniń nátıjesin bermeıdi. 2008 jyldan bastap elimizde zamanaýı 10 qan ortalyǵy quryldy. Bul ortalyqtar sońǵy býyndy tehnologııamen qamtyldy. TMD elderi arasynda Qazaqstan birinshi bolyp qan donorlaryna qatysty eki kezeńdi skrınıngti engizdi. Bul óz kezeginde ınfektsııalyq aýrýlardy anyqtaýǵa kómektesedi», - dedi basqarma basshysy.

Onyń sózine qaraǵanda, 2 myńnan astam qazaqstandyq donor bolyp sanalady. Sonymen qatar, elimizde 100-den asa adam «Qurmetti donor» atanǵan. Qazaqstanda qurmetti donor ataǵyn alý úshin 40 ret qan tapsyrý kerek.

2005 jylǵy mamyrda ótken Dúnıejúzilik densaýlyq saqtaý assambleıasynda álemniń densaýlyq saqtaý mınıstrleri óz erkimen qan tapsyrýdy qoldaý týraly ótinishti qabyldady. Búkilálemdik qan tapsyrýshy kúnin jyl saıyn maýsymnyń 14-inde ótkizip turý týraly qarar qabyldandy.