Elimizde 1 qańtardan bastap qansha adamnyń jalaqysy kóbeıedi
Eńbek jáne halyqty áleýmettik qorǵaý mınıstrliginiń málimetinshe, barlyq saladaǵy menshik nysandaryndaǵy kásiporyndarda jumys isteıtin 1,8 mln-ǵa jýyq jaldamaly jumyskerdiń, onyń ishinde 350 myńǵa jýyq bıýdjet qyzmetkeriniń aqshalaı tabysy kóbeıedi.
Eń tómengi jalaqy – qatardaǵy, biliktiligi joq jumysshyǵa aqshalaı tólemderdi anyqtaýǵa arnalǵan eń tómengi eńbek standarty. Bul rette jumyskerdiń jalaqysy onyń biliktiligine, oryndalatyn jumystyń kúrdeliligine, sany men sapasyna qaraı qalyptastyrylady.
Aıta ketý kerek, Qazaqstanda ETJ mólsheri 2022 jyldan bastap jyl saıyn artyp keledi. 2024 jyldyń 1 qańtarynan bastap 85 myń teńgege deıingi kezekti ósimdi eskeretin bolsaq, úsh jyl ishinde ETJ mólsheri 2 ese artpaq.
Eń birinshi kezekte ETJ-nyń ósýi jalaqysy tómen jumyskerlerge áser etedi. Ekinshiden, jalaqy deńgeıin belgileý kezinde ETJ kórsetkishin paıdalanatyn jumys berýshiler, sondaı-aq razrıad aralyq biliktilik júıesin eskere otyryp, qyzmetkerlerdiń basqa sanattarynyń jalaqysyn qaıta qaraıtyn bolady.
Osynyń nátıjesinde barlyq salada ártúrli menshik nysandaryndaǵy kásiporyndarda jumys isteıtin 1,8 mln-ǵa jýyq jaldamaly jumyskerdiń, onyń ishinde 350 myńǵa jýyq bıýdjet qyzmetkerleriniń aqshalaı tabysy ósedi.
Budan basqa Memleket basshysynyń tapsyrmasyna sáıkes Eńbek jáne halyqty áleýmettik qorǵaý mınıstrligi (budan ári – Eńbekmıni) Dúnıejúzilik banktiń sarapshylarymen birlesip eń tómengi jalaqy mólsherin aıqyndaý ádistemesin ázirledi. Oǵan sáıkes ETJ mólsheri medıanalyq jalaqy men eńbek ónimdiligine qaraı aıqyndalady.
Sonymen qatar 2020 jyldan bastap Qazaqstanda azamattyq qyzmetshilerdiń jalaqy deńgeıin arttyrý boıynsha dáıekti sharalar qabyldanyp jatyr.
Máselen, 2020 jyldyń 1 qańtarynan bastap 2020-2023 jyldar aralyǵynda jyl saıyn shamamen 600 myń pedagogtiń jalaqysyn 25%-ǵa kezeń-kezeńimen arttyrý bastaldy. Nátıjesinde olardyń jalaqysy 2 ese artady.
2021-2023 jyldar aralyǵynda memlekettik mekemelerde jáne kommýnaldyq kásiporyndarda jumys isteıtin 6 myńǵa jýyq medıtsına qyzmetkerleriniń, onyń ishinde dárigerlerdiń jalaqysy 30%-ǵa, orta medıtsınalyq personaldyń jalaqysy jyl saıyn 20% - ǵa kóteriledi.
2021 jyly áleýmettik qamsyzdandyrý salasyndaǵy 38 myń qyzmetkerdiń jalaqysyn kezeń-kezeńimen arttyrý bastaldy, nátıjesinde úsh jyl ishinde (2021 jyldan 2023 jylǵa deıin) olardyń jalaqysy 2 esege ulǵaıady.
2022 jylǵy 1 qańtardan bastap azamattyq qyzmetshilerdiń jekelegen sanattarynyń (shamamen 600 myń) jalaqysyn 2022-2025 jyldar kezeńinde jyl saıyn orta eseppen 20% - ǵa kezeń-kezeńimen arttyrý bastaldy. Nátıjesinde 4 jyl ishinde olardyń jalaqysy 2 ese artady.
Sondaı-aq Eńbekmıni jumyskerlerdiń jalaqysyn kóterý boıynsha jeke kásiporyndarmen túsindirý jumystaryn júrgizýde. Nátıjesinde osy jyldyń basynan bastap 8 myń jumys berýshi 2,8 mln qyzmetkerdiń jalaqysyn 5-ten 50% - ǵa deıin arttyrý týraly sheshim qabyldady.
