«Eleýli progress bar»: DDU Qazaqstandaǵy dári-dármek aınalymy júıesin baǵalady
ASTANA. KAZINFORM — Astanada Dúnıejúzilik densaýlyq saqtaý uıymynyń dárilik zattar men medıtsınalyq buıymdar aınalymynyń Ulttyq retteý júıesin baǵalaý jónindegi mıssııasy aıaqtaldy, dep habarlaıdy DSM baspasóz qyzmeti.
Aýdıt retteýshi organdardyń jetilýin obektıvti baǵalaýǵa múmkindik beretin halyqaralyq ádisnama — jahandyq benchmarkıng quraly boıynsha júrgizildi. Rásim Ulttyq retteý júıesiniń turaqtylyǵy men tıimdiligin halyqaralyq tanýdyń mańyzdy kezeńi retinde qarastyrylady.
— Baǵalaý retteýshiniń negizgi fýnktsııalaryn, sonyń ishinde júıeni jalpy basqarý, dári-dármekterdi tirkeý jáne naryqqa jiberý, farmakologııalyq qadaǵalaý, naryqty baqylaý, lıtsenzııalaý jáne ınspektsııalyq qyzmet, zerthanalyq zertteýler jáne klınıkalyq synaqtardy qadaǵalaý fýnktsııalaryn qamtydy. Mıssııanyń qorytyndysy boıynsha sarapshylar retteýshi júıeni damytýdaǵy eleýli progresti, sapa men qaýipsizdikti qamtamasyz etýdiń zamanaýı tásilderin engizýdi, sondaı-aq protsesterdi dáıekti tsıfrlandyrýdy atap ótti, — delingen habarlamada.
Mıssııanyń jabylý saltanatynda QR Densaýlyq saqtaý mınıstri Aqmaral Álnazarova dárilik zattardyń sapasyn, qaýipsizdigi men tıimdiligin qamtamasyz etý memlekettik saıasattyń sózsiz basymdyǵy bolyp qala beretinin atap ótti.
Onyń aıtýynsha, turaqty, zamanaýı jáne ashyq retteý júıesin qalyptastyrý patsıentter men medıtsınalyq qoǵamdastyqtyń múddelerin qorǵaýǵa baǵyttalǵan.
Densaýlyq saqtaý mınıstrliginiń baspasóz qyzmeti málim etkendeı, mıssııanyń nátıjelerin resmı jarııalaý jáne Ulttyq retteý júıesin odan ári damytý jónindegi usynymdarmen qorytyndy esepti usyný qujatty Jenevadaǵy uıymnyń jahandyq ofısi deńgeıinde qaraǵannan keıin ótedi.
Budan buryn Aqmaral Álnazarova qyzylsha dendep turǵan kezeńde vaktsınatsııanyń qaýipsizdigi men tıimdiligin atap, ata-analardy balalaryn qorǵaýǵa shaqyrdy.