Elena Rybakına Ýımbldonda jartylaı fınaldyq kezdesýin ótkizedi

NUR-SULTAN. QazAqparat – Qazaqstannyń birinshi, álemniń 23-raketkasy Elena Rybakına Ýımbldon týrnırinde jartylaı fınaldyq kezdesýin ótkizedi, dep habarlaıdy QazAqparat tilshisi.

Qazaqstan tennıs federatsııasynan málim etkendeı, qazaqstandyq tennısshi búgin elorda ýaqytymen saǵat 20.00-de Búkilaǵylshyndyq laýn-tennıs klýbynyń ortalyq kortynda álemniń burynǵy birinshi raketkasy, «Úlken dýlyǵa» týrnıriniń eki márte chempıony (Frantsııa ashyq chempıonaty – 2018, Ýımbldon – 2019), qazirgi kezde reıtıngte 18-orynda turǵan rýmynııalyq Sımona Haleppen sheberlik baıqasady.

Qarsylastardyń buǵan deıin ózara úsh ret joldary toqaılasqan. Esep – 2:1, rýmynııalyq sportshynyń paıdasynda.

E.Rybakına 2019 jyly Ýhanda (Qytaı) S.Haleptiń matchty jalǵastyrýdan bas tartýyna baılanysty jeńgen edi.

Al Sımona 2020 jyly Dýbaıda 3:6, 6:3, 7:6 (7:5) jáne ótken jyly US Open jarysynyń úshinshi aınalymynda 7:6 (13:11), 4:6, 6:3 esebimen basym túsken.

Sońǵy eki oıyn da asa tartysty ótti.

E.Rybakına Ulybrıtanııa ashyq chempıonatynda jartylaı fınalǵa deıin Koko Vandevege, Bıanka Andreeský, Chjen Tsınven, Petra Martıch jáne Aıla Tomlıanovıchtan aılasyn asyrdy.

Doda barysynda shırek fınalda ǵana bir partııa utyldy.

Eske sala keteıik, budan buryn Elena Rybakınanyń tuńǵysh ret Ýımbldon týrnıriniń jartylaı fınalyna ótkenin jazǵan bolatynbyz.

Foto: ktf.kz