Elena Rybakına jyldyń qorytyndy týrnırine qatysa alady ma

ASTANA. KAZINFORM — Qazaqstannyń birinshi, álemniń 9-raketkasy Elena Rybakına Nınbo (Qytaı) WTA 500 týrnırinde baq synaıdy. 

Atalǵan jarysta 3-raketka bolyp tirkelgen qazaqstandyq tennısshi ekinshi aınalymda reıtıngide 24-oryndaǵy kanadalyq, 19 jastaǵy Vıktorııa Mboko nemese odan 6 saty tómen turǵan ýkraınalyq Daıana ıAstremskaıanyń qaı jeńgenimen oınaıdy.

Elena Rybakına ótken aptada Qytaıdaǵy Ýhan WTA 1000 dodasynyń shırek fınalynda álemniń 1-raketkasy, belorýssııalyq Arına Sobolenkoǵa 3:6, 3:6 esebimen jol bergen edi.

Saýd Arabııasynda qarasha aıynda ótetin jyldyń qorytyndy týrnırinde WTA chempıondyq kestesinde alǵashqy segizdikke engen tennısshiler joldama alady.

Keshe jańartylǵan chempıondyq kestede Elena Rybakına 3 913 upaımen 8-den 9-orynǵa syrǵydy. Al Ýhanda jartylaı fınalǵa deıin jetken ıtalııalyq Jasmın Paolını 4 131 upaımen 8-satyǵa kóterildi.

Elena Rybakınanyń jyldyń qorytyndy týrnırine iligý-ilikpeýi aldaǵy jarystardy qalaı ótkizetinine baılanysty.

Álemniń 8-raketkasy Jasmın Paolını Nınboda ekinshi aınalymda reıtıngide 31-satydaǵy reseılik Veronıka Kýdermetovamen sheberlik baıqasady.

Nınbo dodasy 19 qazanda máresine jetedi. Ótken jyly munda aýstralııalyq, túbi reseılik Darıa Kasatkına úzdik shyqqan.

Eske sala keteıik, budan buryn Almatyda «Alataý»» tennıs ortalyǵy paıdalanýǵa berilgenin jazǵan edik.