Elena Rybakına Qatardaǵy týrnırde Olımpıada chempıonyn utty

ASTANA. KAZINFORM — Qazaqstannyń birinshi, álemniń 3-raketkasy Elena Rybakına Doha (Qatar) WTA 1000 týrnıriniń shırek fınalyna shyqty. 

Jarystyń 2-raketkasy bolyp tirkelgen qazaqstandyq sportshy úshinshi aınalymda álemdik reıtıngide 26-orynda turǵan qytaılyq Chjen Tsınvenmen kortqa shyqty. 

Jaraqatynan jazylyp, kortqa oralǵan qytaılyq tennısshi kezinde reıtıngide 4-orynǵa deıin kóterilip, sondaı-aq Parıj Olımpıadasynyń chempıony atanǵan edi. 

Qarsylastar osyǵan deıin ózara úsh ret kezdesip, sonyń alǵashqy ekeýinde Rybakına jeńgen edi. Alaıda 2024 jyly WTA qorytyndy týrnırinde Tsınven qarymta qaıyrǵan. 

Aýstralııa ashyq chempıonatynda jeńimpaz atanǵan E.Rybakına búginge deıin qatarynan segiz oıynda jeńiske jetken bolatyn.

Bul joly birinshi partııada esep 2:2 bolǵan mezette Tsınven breık jasap, sol basymdylyqty saqtap qaldy — 6:4.

Ekinshi sette Rybakına 4:1 esebimen alǵa ketti. Sosyn taǵy bir breıkpen túıindedi — 6:2.

Qazaqstandyq tennısshi sheshýshi, úshinshi partııany da breıkpen bastady — 2:0. Esep 5:2 bolyp, dop qabyldaǵanda, Rybakına matchboldan múlt ketti. Sosyn óz geımin berip qoıdy. Degenmen oıyndy taǵy bir breıkpen aıaqtaı aldy — 7:5.

Eki saǵat 28 mınýtqa sozylǵan tartysty básekede Rybakına 6 eıspen birge 10 breık-poınttyń tórteýin paıdalandy. Tsınven 9 eıs, 2 breıkpen (5 breık-poınt) erekshelendi. 

Elena Rybakına jartylaı fınalǵa shyǵý úshin álemniń 13-raketkasy, kanadalyq Vıktorııa Mbokomen talasady. Ol tartysty matchta álemniń 7-raketkasy, reseılik Mırra Andreevany joldan taıdyrdy — 6:3, 3:6, 7:6 (7:5).

Ótken jyly E.Rybakına shırek fınalǵa deıin jetip, onda álemniń 2-raketkasy, Polsha ókili Iga Shventekke ese jibergen bolatyn. 

Eske sala keteıik, budan buryn Elena Rybakınanyń Dohadaǵy týrnırdiń úshinshi aınalymyna joldama alǵanyn jazǵan edik.

Sondaı-aq Anna Danılına Doha týrnıriniń shırek fınalyna shyqty.

Rotterdam týrnırinde Aleksandr Býblık azýly qarsylasynan aılasyn asyrdy.