Elena Rybakına eki jyl burynǵy jetistigin qaıtalady
ASTANA. KAZINFORM – Qazaqstannyń birinshi, álemniń 5-raketkasy Elena Rybakına erekshe nátıjemen kózge tústi.
Búgin qazaqstandyq tennısshi Brısben (Aýstralııa) WTA 500 týrnırinde ıspanııalyq Paýla Badosany jeńgen edi. Osylaısha, ol OptaAce málimetine sáıkes WTA jarystarynda qatarynan 13 ret jeńiske jetip, óziniń úzdik kórsetkishin qaıtalady. Rybakına 2023 jyly Dýbaı men Maıamı jarystary arasynda 13 matchty jeńispen túıindegen edi.
Brısbende Elena Rybakına 9 qańtar kúni tańmen álemniń 20-raketkasy, chehııalyq Karolına Mýhovamen jartylaı fınal joldamasyn sarapqa salady.
2025 jyldy WTA qorytyndy týrnırindegi chempıondyq ataqpen aıaqtaǵan qazaqstandyq tennısshi ótken maýsymdy endi oılamaıtynyn jetkizdi.
– Bul statıstıkany bilgen jaqsy, biraq men aldaǵy matchtardyń árqaısysyna kóńil bólmekshimin. Óıtkeni odan beri biraz ýaqyt ótti. Sondyqtan qazir ótip jatqan týrnır mańyzdyraq. Ár báseke saıyn oıynymdy jaqsarta túsýim kerek, - dedi E.Rybakına.
Qazaqstannyń juptyq syndaǵy birinshi, álemniń 14-raketkasy Anna Danılına serbııalyq Aleksandra Krýnıchpen birge Brısben dodasynyń fınalynan tys qaldy.
Qazaqstandyq-serbııalyq dýet jartylaı fınalda ıspanııalyq Krıstına Býksha – aýstralııalyq Ellen Pereske tartysty matchta jol berdi – 3:6, 6:4, 7:10.
Eske sala keteıik, budan buryn Elena Rybakınanyń jyldyń alǵashqy týrnıriniń shırek fınalyna shyqqanyn jazǵan edik.