Elena Rybakına biregeı kórsetkishke qol jetkizdi

ASTANA. KAZINFORM — Qazaqstandyq Elena Rybakına bıylǵy maýsymda «Úlken dýlyǵa», sondaı-aq WTA 1000 jáne WTA 500 týrnırlerinde 10-nan astam jeńiske qol jetkizgen álemdegi jalǵyz tennısshi atandy.

Bul málimetti E.Rybakına Tokıo WTA 500 jarysynyń jartylaı fınalyna shyqqannan keıin OptaAce saıty jarııa etti. 

Eıs sany jóninen aldyna jan salmaı kele jatqan qazaqstandyq tennısshi sonymen qatar jyldyń qorytyndy týrnırine úsh jyl qatarynan joldama aldy. 2003 jyldan beri mundaı nátıjege bıyl E.Rybakınadan basqa Arına Sobolenko, Iga Shventek, Djessıka Pegýla, Korı Gaýff ıe bolyp otyr. 

WTA qorytyndy dodasy 1-8 qarashada Er-Rııad qalasynda (Saýd Arabııasy) ótedi. Onda atalǵan bes sportshydan basqa Amanda Anısımova, Jasmın Paolını jáne Medıson Kız óner kórsetedi.

Ótken jyly bul jarysta Korı Gaýff chempıon atanǵan bolatyn. 
E.Rybakına sonymen qatar aldaǵy dúısenbide jańartylatyn álemdik reıtıngide J.Paolınıdi artqa tastap, 6-orynǵa kóteriledi.

Eske sala keteıik, budan buryn Býblıktiń Vena týrnıriniń shırek fınalynda álemniń 1-raketkasymen kezdesýi múmkin ekendigin jazǵan edik. 

Sondaı-aq Elena Rybakına jyldyń qorytyndy týrnırine joldama aldy. 

Anna Danılına Tokıo týrnıriniń jartylaı fınalyna shyqty.