Elena Rybakına álemdik reıtıngide úzdik úshtikke kiredi

ASTANA. KAZINFORM – Aýstralııa ashyq chempıonatynyń fınalyna shyqqannan keıin qazaqstandyq tennısshi Elena Rybakına dúısenbide jańartylatyn álemdik reıtıngide úshinshi orynǵa kóteriledi.

Sońǵy básekeniń nátıjesine qaramastan, qazaqstandyq tennısshi qazirgi kezde WTA Live reıtıngisinde 6 910 upaımen 3-orynǵa ornyǵyp tur.

Rybakına óziniń aldyndaǵy amerıkalyqtar Amanda Anısımova men Korı Gaýfty basyp ozdy.
Osylaısha, qazaqstandyq sportshy 2023 jyly maýsymda qol jetkizgen úzdik nátıjesin qaıtalady.

Elenanyń álemniń 1-raketkasy, Belarýs ókili Arına Sobolenkomen fınaldyq matchy senbi kúni ótedi. 

E.Rybakına keıingi on jylda WTA qorytyndy týrnıri men Aýstralııa ashyq chempıonatynyń fınalyna shyqqan úshinshi oıynshy atandy. Budan buryn mundaı kórsetkishke Arına Sobolenko (2022-2023, 2025-2026) jáne danııalyq Karolına Voznıatskı (2017-2018) jetken edi. 

Sonymen qatar senbi kúni Anna Danılına serbııalyq Aleksandra Krýnıchpen birge juptyq synda belgııalyq Elıze Mertens – qytaılyq Chjan Shýaımen chempıondyq ataqty sarapqa salady.

Eske sala keteıik, budan buryn Aýstralııa ashyq chempıonatynda Anna Danılınanyń ekinshi ret fınalǵa joldama alǵanyn jazǵan edik.

Aýstralııa chempıonatynda Elena Rybakına ekinshi ret chempıondyq ataqqa talasady.