Elena Rybakına Ábý-Dabı týrnıriniń jartylaı fınalyna ótti

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Ábý-Dabı (BAÁ) WTA 500 týrnıriniń jartylaı fınalyna joldama aldy.

Jarystyń 1-raketkasy bolyp tirkelgen qazaqstandyq tennısshi shırek fınalda dúnıejúzilik reıtıngide 33-orynda turǵan «Úlken dýlyǵa» týrnıriniń úsh dúrkin fınalısi, týnıstik Ons Jabermen sheberlik baıqasty.

Osyǵan deıin qarsylastar bes ret kezdesse, sonyń úsheýinde týnıstik tennısshi jeńgen edi. Degenmen 2022 jyly Ýımbldon týrnıriniń fınalynda qazaqstandyq tennısshiniń utyp, chempıon atanǵany belgili.

Bul joly Rybakına matchty sátti bastap, birinshi partııada qos breıkke qol jetkizdi – 6:2. Alaıda ekinshi sette sol qarqynynan aıyrylyp qalyp, Jaber 5:1 esebimen alǵa ketti. Qazaqstandyq tennısshi esepti tek qysqarta aldy – 4:6. 

Úshinshi, sheshýshi sette esep 3:2 bolǵan mezette Elena breık jasaǵanymen, óz geımin berip qoıdy. Sosyn esep 6:5 bolǵanda, eki matchbolyn paıdalana almady – 6:6. Degenmen taı-breıkte tarazy basyn aýdardy – 7:6 (7:4).

Eki saǵat 13 mınýtqa sozylǵan asa tartysty básekede Rybakına 3 eıspen birge 10 breık-poınttyń tórteýin óz esebine jazdy. Jaber 1 eıs, 3 breıkpen (5 breık-poınt) kózge tústi. 

Elena Rybakına júlde qory 1 mln AQSh dollarynan asatyn dodanyń fınalyna shyǵý úshin kezinde reıtıngide 4-orynǵa deıin kóterilgen, qazir 157-satyda turǵan shveıtsarııalyq Belında Benchıchpen talasady. Ol shırek fınalda álemniń 37-raketkasy, 2023 jylǵy Ýımbldon jeńimpazy, chehııalyq Marketa Vondroýshovany joldan taıdyrdy – 7:5, 6:3.

E.Rybakına Tokıo Olımpıadasynyń jartylaı fınalynda B.Benchıchke ese jiberip, medaldan tys qalǵan bolatyn.

Taǵy bir qazaqstandyq, álemniń 353-raketkasy Zarına Dııas Mýmbaı (Úndistan) chellendjer týrnıriniń ekinshi aınalymynan asa almady. Ol 15 jastaǵy úndistandyq Maııa Radjeshvaran Revatıge jol berdi – 3:6, 2:3. Ekinshi sette Zarına matchty jalǵastyrýdan bas tartty.

Eske sala keteıik, budan buryn Elena Rybakınanyń Ábý-Dabı týrnırinde kambek jasap, shırek fınalǵa shyqqanyn jazǵan edik.

Sondaı-aq Tımofeı Skatov Úndistandaǵy jarystyń shırek fınalyna joldama aldy.