Elektrosamokat mingen adamnyń jolda júrý tártibi aıqyndalady

NUR-SULTAN. QazAqparat – Elimizde elektrosamokatpen qatynaıtyn adamnyń jolda júrý tártibi aıqyndalady. Bul týraly QR ІІM Ákimshilik polıtsııa komıteti tóraǵasynyń orynbasary Jandos Muratálıev aıtty, dep habarlaıdy QazAqparat tilshisi.

«1 shildede elektr samokattarynyń tehnıkalyq sıpattamasyn belgileıtin ulttyq standart kúshine endi. Osy standarttyń talaptaryn eskere otyryp, elektrosamokatty basqaratyn adamnyń quqyqtyq mártebesi máselesin qarastyramyz. Sondaı-aq olardyń jolda júrý tártibin anyqtaımyz», - dedi ol ІІM baspasóz qyzmeti alańynda ótken brıfıngte.

Onyń atap ótýinshe, bul túzetýler «óreskel» quqyq buzýshylarǵa qatysty ákimshilik yqpal etýdiń tıimdi is-sharalaryn qabyldaýǵa múmkindik beredi.

«Meniń oıymsha, bul túzetýler sonymen qatar eldegi apat jaǵdaıyna oń áser etedi», - dedi Jandos Muratálıev.