Elektrondyq temeki qarapaıym temekiden anaǵurlym zııandy ári qaýipti - pýlmonolog-dáriger
«Elektrondyq temeki nemese veıp, elektrondyq tasymaldaǵysh túrinde mýndshtýk, batareıa jáne qyzdyrýshy bólshekten, arnaıy toltyrǵysh – suıyqtyqtan turatyn atomaızerden quralǵan. Suıyqtyq hosh ıistendirgish qosyndylardan jáne nıkotınnen turady. Jeke túrde – kannabınoıd quramyna kiretin, tetragıdrokannabınoldan jasalǵan. Bul qondyrǵylar glıtserın jáne propılenglıkol negizindegi suıyqtyqty qyzdyrady, sodan temekiniń tútini emes, bý paıda bolady. Bul zattar ókpeniń ishine tunyp turyp, fıbrozǵa ákeledi. Ony neǵurlym kóp tartsa, soǵurlym tynys alý jolyna keri áserin tıgizedi. Basqasha aıtqanda, «ókpe daǵy» týyndaıdy»,- dedi S.Asfendııarov atyndaǵy QazUMÝ kafedrasynyń dotsenti, Almaty qalalyq №36 emhananyń pýlmonolog-dárigeri Dame Saılanova.
Mamannyń aıtýynsha, elektrondyq temeki qarapaıym temekiden anaǵurlym zııandy ári qaýipti. Sebebi munda nıkotın býlanyp, aýyz qýysynyń shyryshty qabatyn kúıdiredi, bul onkologııalyq aýrýlarǵa ákeledi, tynys alý júıesin zaqymdaıdy. Bas mıy tamyrlarynyń aterosklerozyna aparady, sebebi, ony tartqan kezde nıkotın qanǵa óte jyldam enedi. Sodan keıin búırek bezimen adrenalın shyǵyp, arterıaldyq qan qysymy joǵarylap, júrek yrǵaǵy qysqarady. Bul júrekke qatty júkteme túsirip, saldarynan júrek-qantamyr aýrýshańdyǵy damıdy. Adam uıqysy nasharlap, tez ashýlanady jáne nazar aýdarý qabileti tómendeıdi.
Psıhıkalyq densaýlyq ortalyǵynyń psıhology Elena Manjıkovanyń aıtýynsha, eger jasóspirimder elektrondyq temekini erte jastan tutyna bastasa, soǵurlym olardy táýeldilikten qutqarý aýyr bolatynyn jetkizdi.
«Eger jasóspirim elektrondyq temekini, máselen, 13 jasta tarta bastasa jáne ony bes jyldan asa tartsa, keıin ony tastaý óte qıyn. Munda psıhoterapııany, akkýpýntýralyq terapııany, tipti gıpnozdy qoldanýǵa týra keledi. Eń aldymen, patsıenttiń óz qalaýy bolýy kerek jáne balamen birge onyń ata-anasymen jumys isteıtin narkolog-psıhıatr dárigerge ýaqytynda júginý qajet. Emdeý barysynda ata-analary óz balalaryn qoldap, sol táýeldilikten arylýyna kómektesýi kerek. Sebebi, bul jaǵdaıǵa balalaryna durys qaramaǵan ata-analar da kináli. Balaǵa sondaı-aq, júrgen ortasy áser etýi múmkin», - dedi Elena Manjıkova.
Dárigerler ata-analarǵa eger balalary jaman ádetti tastaı almaǵan jaǵdaıda, Maqataev kóshesi, 10 mekenjaıynda ornalasqan Psıhıkalyq densaýlyq ortalyǵy janyndaǵy emhanaǵa barýǵa shaqyrdy. Munda mamandar ýaqytynda jáne tegin túrde konsýltatıvtik, medıtsınalyq, psıhologııalyq kómek kórsetedi. Sondaı-aq, dárigerler 8 -701-733-33-59 nomeri boıynsha senim telefonyna (táýlik boıy) qońyraý shalýǵa nemese https://cpzalmaty.kz siltemesi arqyly Psıhıkalyq densaýlyq ortalyǵynyń saıtyna jazýǵa bolatynyn málimdedi.
