Elektrondy saýda memlekettiń fıskaldy fýnktsııasyn qalaı ózgertedi
QR Qarjy mınıstrligi Memlekettik kirister komıteti tóraǵasynyń orynbasary Ǵosman Ámrınniń pikirinshe, elektrondy saýda salyq pen keden salasyndaǵy qarym-qatynastardy túbegeıli ózgertedi. Ol ózgerister kóp uzamaı, bizge de keledi.
«Mysaly, qazir AliExpress, WeChat, Ebay sııaqty qyzmetter bar. Olar aıtady, kez kelgen taýar satylǵanda onyń qaıdan shyqqany, qandaı baǵamen kelgeni jáne taǵy basqa kórsetkishter elektrondy júıede kórsetiledi. Taýardyń aınalymy da belgili. Elektrondy júıede salyq ta avtomatty túrde esepteledi. Al bári avtomatty túrde bolsa, salyq jáne keden organdarynyń fıskaldy fýnktsııasy ne úshin kerek? Olardyń aıtýynsha, bul fýnktsııany biz de atqara alamyz. Sebebi elektrondy júıe arqyly salyqty eseptep, avtomatty túrde bıýdjetke aýdarýǵa múmkindik bar. Meniń oıymsha, ondaıda elektrondy saýda alańdary bizdiń fýnktsııamyzdy jekeshelendirip alýy ábden múmkin», - dedi Ǵ.Ámrın QazAqparat tilshisine bergen suxbatynda.
Onyń aıtýynsha, tsıfrlyq texnologııalardyń dendep enýi qaǵazbasty jumystan bas tartýǵa týra keledi. Deklaratsııa toltyrý, salyq tóleýshilerdiń tizimin jasaý, boryshkerlerdiń qaryzyn óndirip alý - bári-bári artta qalady. Elektrondy júıe bárin avtomatty túrde jasaıdy.
«Biz ony áli sezbeı júrmiz. Men ózim Qytaıda bolyp, WeChat-tyń jumysyn kórdim. Bizde de solaı bolady dep oılaımyn. Shynymdy aıtsam, ózim de qorqyp kettim...», - deıdi Ǵ.Ámrın.
