Elektrondyq eńbek bırjasy: Elimizge 60 myń maman qajet
ASTANA. KAZINFORM – Elektrondyq eńbek bırjasynda 60 myńǵa jýyq bos jumys orny bar. Bul týraly Jibek Joly arnasynyń «Búgin LIVE» baǵdarlamasyna suhbat bergen QR Eńbek jáne halyqty áleýmettik qoldaý mınıstrliginiń mamany málimdedi.
– QR Eńbek jáne halyqty áleýmettik qoldaý mınıstrligi 2018 jyldyń qańtar aıynan bastap elektrondyq eńbek bırjasyn ázirlep, paıdalanýǵa berdi. Bul portaldyń maqsaty – azamattardy jumysqa ornalastyrý jáne jumys berýshilerge qoldaý kórsetý. Elektrondyq eńbek bırjasy – elimizdegi eń basty tsıfrlyq alań. Bizge jyl saıyn 800 myńnan astam jumys oryndary men túıindemeler ornalastyrylady. Jáne jyl saıyn 400 myń adam osy portal arqyly jumys tabady. Osy portal jumysyn bastaǵaly beri 3 mln adamdy jumysqa ornalastyrdy. Onyń ishinde 2 mln adam turaqty jumysqa ornalasty. Qalǵan 1 mıllıony ýaqytsha jumysqa turdy. Dál qazirgi tańda bul platformada 59 myńdaı bos jumys oryndary bar, – deıdi Halyqty jumyspen qamtý departamentiniń bas sarapshysy Janar Musabekova.
Dese de, mundaı bos jumys oryndaryna kez kelgen adam ornalasa almaıdy. Qazaqstan Respýblıkasynyń azamattaryn el aýmaǵynda jumysqa ornalastyrý talaptary Eńbek kodeksimen retteledi. Stýdııada qonaq bolǵan Balalardyń quqyǵyn qorǵaý komıtetiniń bas sarapshysy dál osy sharttardy túsindirdi.
– Bul kodekske sáıkes, eńbek sharty 16 jastan bastap jasalady. Taǵy aıtyp ketetin jaǵdaı: eger kámeletke tolmaǵan, biraq jalpy orta bilimdi aıaqtaǵan bala bolsa – 15 jastan bastap; eger densaýlyǵyna eshqandaı zııan keltirmeıtin jumys bolsa – 14 jastan bastap eńbek sharty jasalady. Sonymen qatar, tsırk, teatr, kıno uıymdarynda 14 jasqa deıingi balalar da jumys isteı alady. Biraq ol balanyń zańdy ókili mindetti túrde eńbek shartymen tanysyp, qol qoıyp, balasynyń jumys barysyn baqylaýǵa mindetti, – deıdi Albına Zalmuqanova.
Maman kámelet jasqa tolmaǵan balalardyń zańǵa sáıkes eńbek etý talaptaryna toqtaldy.
– Bizdiń elimizdiń zańnamasyna sáıkes, 14–16 jas aralyǵyndaǵy balalarǵa aptasyna 24 saǵattan aspaıtyn kólemde jumys isteýge ruqsat etiledi. Jáne densaýlyǵyna zııan, ómirine qaýip tóndiretin aýyr jumystarǵa balalardy tartýǵa qatań tyıym salynady. Balanyń ómiri men qaýipsizdigine eń birinshi jaýapty – onyń ata-anasy. Ata-analar balalarynyń qansha saǵat, qandaı jumys istep jatqanyn baqylaýǵa alý kerek, – deıdi QR Eńbek jáne halyqty áleýmettik qoldaý mınıstrliginiń qyzmetkeri.
Aıta keteıik, buǵan deıin «Búgin LIVE» baǵdarlamasynda zańger kásipkerlerdiń jumysshylardy tegin tájirıbeden ótkizýi zańsyz degen pikir bildirgen edi.