Elektrondy qyzmetterdi JI baqylaıdy
ASTANA. KAZINFORM — Elektrondy qyzmetterdiń toqtap qalýy nemese múlde qoljetimsiz bolýy kópshiliktiń ýaqytyn alady. Endi mundaı jaǵdaıdyń aldyn alýǵa jasandy ıntellekt kómektesedi. Bul týraly Jibek joly telearnasynyń jańalyqtar qyzmetinde aıtty.
Elde álem boıynsha aldyńǵy qatardaǵy Dynatrace platformasyn engizbek. Bul júıe memlekettik jáne qarjy sektoryndaǵy serverlerdiń jumysyn baqylap qana qoımaı, aqaýlardy der kezinde anyqtaýǵa kómektespek. Jasandy ıntellekt memlekettik platformalardyń jumysyn qalaı jaqsarta alady?
Dynatrace — álemde keńinen qoldanylatyn tsıfrlyq baqylaý júıesi. Ol serverler, saıttar jáne mobıldi qosymshalardyń jumysyn ýaqytyly baqylaıdy. Platforma jasandy ıntellekt kómegimen kez kelgen tehnıkalyq aqaýdy aldyn ala baıqap, mamandarǵa habar jiberedi.
— Memlekettik sektordaǵy tehnologııanyń damý deńgeıi boıynsha Qazaqstan álemdegi on eldiń qatarynda. Biraq júıeniń baıaý jumys isteýi nemese jıi isten shyǵýy áli de ózekti másele. Biz Dynatrace platformasy arqyly osy qıyndyqty sheshýge kómektesip otyrmyz. Bul qyzmet sapasyn áldeqaıda jaqsartady. Sebebi biz máseleni tereń taldap, onyń negizgi sebebin anyqtaı alamyz. Bul tapsyrys berýshiniń ýaqytyn únemdeýge múmkindik beredi jáne ol máseleniń saldaryn emes, sebebin joıýǵa birden kirise alady, - deıdi Dynatrace kompanııasynyń qazaqstandaǵy negizgi seriktesi Igor Homkov.
Aqyldy júıe tek memlekettik qurylymdarda ǵana emes, qazaqstandyq bankterde de qoldanylyp keledi. Búginde bul júıe eldegi eń iri qarjy uıymdarynyń qyzmetteriniń úzdiksiz jumys isteýine kómektesip otyr. Jalpy alǵanda, álem boıynsha tórt myńnan astam kompanııa osy platformaǵa elektrondy qyzmetteri men serverlerin senip tapsyrǵan.
— Kóp jaǵdaıda memlekettik qyzmetter týraly aıtqanda e-gov platformasyn ǵana aıtamyz. Biraq onymen qatar jumys isteıtin polıtsııa sııaqty basqa da qurylymdar bar. Solardyń da tsıfrlyq júıeleri senimdi jumys isteýi kerek. Biz bul baǵytta óz qoldaýymyzdy kórsetip, júıeniń turaqtylyǵyn arttyrýǵa kómektesemiz, - deıdi Dynatrace kompanııasynyń seriktestik satý jónindegi menedjeri Marıýsh Gaevskıı.
Dynatrace búginde ІT-monıtorıng salasyndaǵy álemdik kóshbasshylardyń biri. Platforma júzdegen elde qoldanylady jáne jasandy ıntellekt arqyly tsıfrlyq júıelerdiń úzdiksiz jumys isteýine kómektesedi. Osyndaı aqyldy platformalar elektrondy qyzmetterdiń sapasyn arttyryp, azamattarǵa kórsetiletin onlıan servısterdiń senimdiligin kúsheıtpek.
Aıta ketelik elektrondy qyzmetter halyqtyń 13 mlrd teńgesin únemdegen edi.