Elektrondy qyzmetter halyqtyń 13 mlrd teńgesin únemdedi

ASTANA. KAZINFORM – Prezıdent Joldaýyndaǵy jáne ózge de tapsyrmalaryn júzege asyrý aıasynda elimizde IT-tehnologııa arqyly azamattarǵa arnalǵan tsıfrlyq qyzmetterdi damytý jumystary júrgizilýde.

Elimizde G2C (azamattarǵa arnalǵan memleket) formatyndaǵy tsıfrlyq servıster belsendi túrde engizilip jatyr. Bul memlekettik qyzmetterdi alýdy jedeldetip, ashyq ári qoljetimdi etýge jol ashty.

QR TsDIAÓM málimetinshe, elektrondy medıtsınalyq anyqtamalar men eńbekke ýaqytsha jaramsyzdyq paraqtaryn tsıfrlyq formatqa tolyq kóshirý kóleńkeli ekonomıkany 7,5 mlrd teńgege qysqartýǵa múmkindik berdi. Sondaı-aq bıýdjet qarajatynan 450 mln teńge únemdeldi. 1,5 mln qyzmet túrin qamtıtyn telemedıtsına servısi qashyqtan keńes berýge jáne dıagnostıkalaýǵa jol ashyp, halyqtyń 13 mlrd teńgeden astam qarjysyn únemdeýge sep boldy.

Balabaqshalar men mektepterge qabyldaý tsıfrlyq formatqa kóshirildi. Joǵary oqý oryndaryna qabyldaý jáne jataqhanaǵa ornalastyrý da onlaın júzege asyrylýda. Biryńǵaı servıs arqyly qujat tapsyrýǵa, emhanaǵa tirkelýge, áskerı esepke turýǵa jáne jataqhanadan oryn alýǵa bolady. UBT-nyń elektrondy sertıfıkatyn engizý nátıjesinde bıýdjet qarajaty 83 mln teńge únemdelip, azamattardyń shyǵyny 300 mln teńgeden astam somaǵa qysqardy.

Áleýmettik salaǵa da tsıfrlyq sheshimder engizilýde. «Áleýmettik ámııan» arqyly mektep oqýshylaryna tegin tamaq berý protsesi baqylaýǵa alyndy. Bul bıýdjet qarajatyn tıimdi paıdalanýǵa múmkindik beredi. Joba aýqymy keńeıip, elimizdegi barlyq mektepterde engizilmek.

«Áleýmettik ámııan arqyly tegin tamaq berý protsesi baqylaýǵa alyndy. Ol arqyly bıýdjet qarajatyn únemdep, tıimdi paıdalanýǵa múmkindik týdy. Bul joba elimizdegi barlyq mektepterde engizilip jatyr», – dedi tsıfrlyq damý, ınnovatsııa jáne aeroǵarysh ónerkásibi mınıstri Jaslan Mádıev.

Aıta keteıik, 49 áleýmettik qyzmettiń 45‑i elektrondyq formatqa kóshirildi.