Elektrondy apostıl: Qazaqstan qujattary 90 elde jaramdy bolady
ASTANA. KAZINFORM — Maqsut Narikbayev ýnıversıtetinde elektrondy apostıl júıesin (E-Apostıl) ázirleý men engizýge arnalǵan halyqaralyq forým ótip jatyr. Ortalyq Azııa aýmaǵyndaǵy alǵashqy konferentsııany Halyqaralyq jeke quqyq boıynsha Gaaga konferentsııasy uıymdastyrǵan.
QR Ádilet mınıstri Azamat Esqaraevtyń aıtýynsha, Qazaqstan 1999 jyly Gaaganyń apostıl konventsııasyna qosylǵan Ortalyq Azııadaǵy alǵashqy el boldy. Osynyń arqasynda Qazaqstan aýmaǵynda shyǵarylǵan qujattar apostıl arqyly kýálandyrylady jáne osy konventsııaǵa qol qoıǵan barlyq elderde tanylady. Bul qatysýshy elder arasynda resmı qujattardy tanýdy edáýir jeńildetti. Saýdanyń damýyna, tájirıbe almasýǵa jáne elder arasyndaǵy kóshi-qonǵa yqpal etti.
«Elektrondy apostıl qujattardy elektrondy formatta zańdastyrýǵa múmkindik beretin jáne mańyzdy praktıkalyq úles qosatyn ártúrli bastamalarǵa jol ashady. Búgingi kezdesý tsıfrlandyrý jáne memlekettik qyzmetter salasynda halyqaralyq yntymaqtastyqty nyǵaıtýdaǵy mańyzdy qadam sanalady. Qazaqstannyń osy Konventsııaǵa kirýi bizdiń memlekettik qyzmetterimizdi halyqaralyq qatynastardyń jahandyq júıesine ıntegratsııalaýǵa kómektesedi, bul protsesti anaǵurlym ońaı jáne qoljetimdi etedi», — dedi Ádilet mınıstri konferentsııanyń ashylýynda.
2021 jyly Qazaqstanda elektrondy apostıldeý júıesi engizildi. Bul qujattardy zańdastyrý protsesin jeńildetýge jáne osy saladaǵy zańnamany jaqsartýǵa múmkindik berdi.
Qazaqstanda 9 memlekettik organǵa apostıl qoıý quqyǵy berilgen, sonyń ishinde Ádilet mınıstrligi, Bas prokýratýra jáne basqa da organdar bar.
e-Apostille elektrondy júıesi apostıldengen qujattardyń elektrondy reestrin júrgizý jáne elektrondy apostılderdi jasaý úshin engizilgen. Sondaı-aq, e-Government (egov.kz) portaly arqyly ótinish berip, qyzmetterge tólem jasaýǵa bolady.
2021 jyldan 2024 jylǵa deıin apostıldeý boıynsha 604 508 qyzmet kórsetildi, onyń ishinde 36 244 — elektrondy apostılder. Apostıldengen qujattardyń sany boıynsha Túrkııa, Koreıa, Germanııa, AQSh elderi kósh bastap tur.
Gaagadaǵy halyqaralyq jeke quqyq jónindegi konferentsııanyń Bas hatshysy Krıstof Bernaskonı apostıl konventsııasyna búginde álemniń 127 eli qol qoıǵanyn aıtty.
«Bul eń keń ratıfıkatsııalanǵan konventsııa. 2021 jylǵy forýmnan beri konventsııaǵa taǵy 8 el — Indonezııa, Saýd Arabııasy, Pákistan, Senegal, Qytaı, Kanada, Rýanda jáne jaqynda ǵana Bangladesh qosyldy», — dedi K. Bernaskonı.
«Elektrondy apostıldi qoldanýdyń negizgi maqsaty — shetelde azamattarymyzdyń quqyqtaryn qorǵaý. Elektrondy apostıldiń ózi — buryn berilgen qujatty zańdastyrýdyń jeńildetilgen túri, osylaısha onyń zańdy qujat ekenin rastaıdy. Bul qujattar Gaaga konferentsııasyna qatysýshy 90 elde zańdy dep tanylady. Bul bizdiń azamattar úshin óte yńǵaıly — shetelde júrgen kezde de, Qazaqstanǵa qaıtpaı-aq, elektrondy apostıl arqyly qajetti qujattardy onlaın formatta alyp, olardy zańdastyrýǵa múmkindik beredi», — dedi Azamat Esqaraev.
