Elektromobılge arnaıy belgi taǵylmasa qansha aıyppul salynady
ASTANA. KAZINFORM – Elimizde elektromobılderge arnaıy taný belgisin taǵý mindetti. Bul týraly QR ІІM Ákimshilik polıtsııa komıtetiniń basqarma tóraǵasy Murat Imanbaev aıtty.
«Jol júrý erejesinde anyq jazylǵan. Elektromobılder arnaıy taný belgisin taǵýy kerek. Adamdar «Sh» taný belgisimen shatystyryp jatady, ondaı belgi erikti túrde taǵylady. Al elektromobılderge arnaıy belgini jabystyrý mindetti sanalady. Olaı bolmaǵan jaǵdaıda, ákimshilik jaza qarastyrylǵan», - dedi ol OKQ alańynda ótken baspasóz máslıhatynda.
Ákimshilik polıtsııa komıtetiniń basshysy Qaısar Sultanbaev bul talapty buzǵandarǵa qansha somada aıyppul salynatynyn atap ótti.
«Kólik quraldaryn paıdalanýǵa ruqsat berý jónindegi negizgi erejelerdiń» 9-tarmaǵyna saı, elektromobılderge qabyrǵasy bir júz elý mıllımetr jasyl tústi sharshy túrinde jáne qara tústi 7.22 jol belgisiniń rámizi beınelengen «Elektromobıl» taný belgisi kóliktiń artqy jaǵyna jabystyrylady. Bundaı taný belgisin taqpaǵan júrgizýshilerge Ákimshilik quqyq buzýshylyq týraly kodekstiń 620-babyna saı birinshi ret ustalǵanda eskertý berip, qaıtalanǵan jaǵdaıda 3 AEK kóleminde aıyppul salý qarastyrylǵan», - dedi komıtet basshysy.
Qaısar Sultanbaev «Elektromobıl» taný belgisin taǵý talaby áýelde elektrmen júretin kólik júrgizýshileriniń ózderine yńǵaıly bolýy úshin engizilgenin atap ótti. Sebebi elektr mashınasyn qýattandyrýǵa bolatyn arnaıy oryndar bolady, onda basqa kólikter turmaýy tıis. Inspektorlar álgi taný belgisin kórse, óz jónimen júre beredi. Ondaı taný belgisi joq kóliktiń turǵanyn kórse, ol jerden kólikti aldyrýǵa áreket jasaıdy.
«Sondyqtan elektr qýatymen júretin kólik ıeleri birinshi kezekte mundaı belginiń bolýyna ózderi múddeli bolýy kerek», - dep túıdi sózin Ákimshilik polıtsııa komıtetiniń tóraǵasy.
Aıta keteıik, elimizde «Jasyryn patrýl» júıesi engizilip jatyr.
Sondaı-aq budan bylaı adam tasymalymen tek jeke tasymaldaýshy retinde tirkelgen tulǵalar ǵana aınalysa alatyn bolady.
Odan bólek, qysqy maýsymda jazǵy dońǵalaqpen júrgen júrgizýshige qansha aıyppul salynatynyn jazǵan edik.
