Elektromobıl ıelerine aqysyz turaq berý usynyldy

ASTANA. KAZINFORM – Májilis depýtattary elektromobıl ıelerine aqysyz kólik turaǵyn berýdi usynyp otyr. Bul týraly elektromobılderge arnalǵan ınfraqurylymdy damytýǵa baǵyttalǵan zań jobasyn ázirleýshi toptyń jetekshisi, depýtat Arman Qalyqov aıtty.

«Zań jobasynda elektrli qozǵalyspen jabdyqtalǵan kólikterdi qańtarýǵa jáne qoıýǵa arnalǵan arnaıy turaq oryndaryn bólýdi, elektromobıl ıelerin kólik turaǵy orny úshin aqy tóleýden bosatýdy kózdeıdi», – dedi depýtat.

Bul qujatty birinshi oqylymda tanystyrǵan depýtat Samat Musabaev BAQ ókilderine bergen suhbatynda atalmysh usynysty qoldaıtynyn aıtty.

«Barlyq turaqty elektromobılderge berip tastamaıdy. Bul jerde paıyzdyq qatynas qaǵıdaty boıynsha bólinedi. 100-ge 10, 50 oryn bolsa 5 oryn degen sııaqty. Janarmaı quıý stansalarynyń janyndaǵy elektromobılderge arnalǵan oryndarǵa basqa kólikter qoısa, aılyq eseptik kórsetkish kóleminde aıyppul salynatynyn aıttyq. Elektromobıl turaǵy ekenin bildiretin belgi turady. Soǵan basqa kólik qoısa aıyppul bolady. Múgedektigi bar adamdarǵa arnalǵan kólik turaǵyna qoısa, AEK: Al biz elektromobıl turaǵyna AEK dep otyrmyz.

Elektromobıl ıelerine ǵana arnalǵan turaq oryndaryn tegin etý azamattardy alalaý dep oılamaımyn. Óıtkeni bul qarapaıym adamdarǵa arnalǵan. Qarapaıym adamǵa reseılik kólik alǵannan osy jaqsy emes pe. Turaq tegin bolsa, parkıngti tegin qylsa, salyqty tegin qylsa, ýtıl alymdy tegin qylsa, qarapaıym adamǵa jasalyp jatqan zań bolmaı ma? Menińshe, elektromobılderdiń baǵasy halyqqa qoljetimdi. Naqty qansha ekenin bilmeımin. Mysaly qytaılyq elektromobılder óte arzan», - deıdi Samat Musabaev.