Elektr samokattyń jyldamdyǵy saıabaq aýmaǵynda avtomatty túrde báseńdeýi kerek - ІІM

ASTANA. QazAqparat – Elektr samokattardyń jyldamdyǵyn baqylaıtyn jańa tsıfrlyq tehnologııalar engizý kerek. Bul týraly elordada joldaǵy qaýipsizdik salasynda jańa tehnologııalardy paıdalaný taqyrybyndaǵy forýmda QR Іshki ister mınıstriniń orynbasary Igor Lepeha aıtty, dep habarlaıdy QazAqparat tilshisi.

«Májiliste qabyldanǵan qujat aıasynda elektr samokattar trotýarda jáne jaıaý júrginshiler jolaǵynda júre alady. Degenmen, olardyń jyldamdyǵy saǵatyna 6 kılometrden aspaýy tıis. Osy oraıda bul samokattardyń jyldamdyǵyn jańa tehnologııalar arqyly baqylaý múmkindigin qarastyrý kerek», - dedi I.Lepeha tsıfrlandyrý salasynyń mamandaryna qarata aıtqan sózinde.

Osy oraıda ol atalǵan zań kúshine engennen keıin, samokattardy jalǵa beretin kompanııalar jolda jáne trotýarda júretin bul kóliktiń tıisti jyldamdyǵyn qamtamasyz etýi kerek ekenin aıtty.

«Bul kompanııalar jyldamdyqty qadaǵalaý tehnıkalyq turǵyda retteletinin sendirip otyr. Eger samokat saıabaq aýmaǵyna jaqyndaǵan kezde, onyń jyldamdyǵy avtomatty túrde báseńdeıdi. Alaıda biz osy salada basqa da qurylǵylar jekeleı baqylaǵany durys dep sanaımyz. Sondyqtan sala mamandarynan tsıfrlyq baǵytta qosymsha usynystar kútip otyrmyz», - dedi mınıstrdiń orynbasary.

Budan buryn habarlanǵandaı, bıyl 10 mamyrda Májilis «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańyn qabyldandy.

Jobaǵa sáıkes elektr samokattar kólik quraly retinde tanylady, sondaı-aq júrý jyldamdyǵy saǵatyna 25 kılometrge deıingi kólik quraldary elektr samokat sanatyna jatady. Elektr samokattar velosıped joldary men jol jıekterinde shekteýsiz júre alady. Trotýarlarda saǵatyna 6 kılometrden aspaıtyn jyldamdyqpen júrýge ruqsat etiledi.

Elektr samokatpen joldyń oń jaq shetki bóliginde 18 jasqa tolǵan adamdar júre alady.

Jolda shlem kımegen elektr samokat júrgizýshilerine aıyppul salynady.