Elektr energetıkasynda mamandarǵa suranys qanshalyqty artady
ASTANA. KAZINFORM — Qazaqstandaǵy energetıka salasynda bilikti mamandarǵa joǵary suranys bar. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda QR Eńbek jáne halyqty áleýmettik qorǵaý mınıstrligi Kóshi-qon komıteti tóraǵasynyń orynbasary Nurlan Tájibaev málim etti.
Onyń aıtýynsha, qazir elimizde shamamen 9,3 mln adam jumyspen qamtylǵan, olardyń basym bóligi ónerkásip, qyzmet kórsetý jáne saýda salalarynda jumys isteıdi. Budan bólek, energetıka salasyndaǵy jumysshylardyń ortasha jasy 40-tyń shamasynda, olardyń úshten bir bóligi 34 jastan tómen.
- Aldyn ala esepteýlerge sáıkes, 2030 jylǵa qaraı ekonomıkaǵa qosymsha 1,5 mıllıon maman qajet bolady, onyń 68 myńǵa jýyǵy elektr energetıkasyna, atom jáne munaı-gaz sektorlaryna kerek, - dedi N. Tájibaev.
Ol qazirdiń ózinde salada 2 myńnan astam bos jumys orny bar ekenin, bul jaǵdaıǵa baılanysty mamandarǵa degen suranystyń joǵary ekenin atap ótti. Eń úlken suranys dıspetcher, ınjener, energetık jáne elektr energııasymen qamtamasyz etý baqylaýshysy mamandyqtaryna qatysty.
- Jahandyq úrdisti eskere otyryp, bolashaqtyń mamandyqtary erekshe perspektıvaly sanalady, ıaǵnı jańartylatyn energııa ınjenerlerin, energetıka salasyndaǵy data-analıtıkterdi, sýtegi energetıkasy boıynsha sarapshylardy atap ótken jón, - dedi komıtet ókili.
Budan buryn habarlanǵandaı, búgingi forýmda Úkimet basshysy Oljas Bektenov Qazaqstan Ortalyq Azııadaǵy eń iri polımer óndirýshi elge aınalatynyn aıtty.