Eldiń ońtústiginde elektr energııasyna shekteýler engiziletini ras pa

ASTANA. KAZINFORM — Qazaqstannyń ońtústik óńirinde elektr energııasyna shekteýler engiziledi degen aqparat shyndyqqa sáıkes kelmeıdi, dep habarlaıdy Energetıka mınıstrligi.

Mınıstrlik keıbir áleýmettik jelide taraǵan eldiń ońtústik óńirlerinde elektr energııasyn shekteýge daıyndyq júrgizilip jatyr degen aqparattyń eshqandaı negizi joq ekenin resmı túrde málimdeıdi. Vedomstvo azamattar men BAQ ókilderin tek resmı derekkózderge senýge shaqyrady.

— Qazirgi tańda Qazaqstannyń ońtústik oblystaryndaǵy tutynýshylardy elektrmen jabdyqtaý jaǵdaıy tolyqtaı turaqty dep baǵalanady. Elektr energııasyn jetkizý qalypty rejımde júzege asyrylyp, halyqtyń da, ónerkásiptik kásiporyndardyń da barlyq qajettilikterin tolyq qamtyp otyr. Eldiń biryńǵaı elektr energetıkalyq júıesi eshqandaı aqaýsyz jumys istep jatyr. Energetıka mınıstrligi respýblıka boıynsha elektr energııasyn óndirý men tutyný teńgerimin turaqty baqylaýda ustaıdy. Barlyq óndiretin jáne jetkizýshi kompanııalar bekitilgen kesteler aıasynda jumys istep, energojúıeniń senimdiligin qamtamasyz etýde, — dep atap ótti vedomstvo.

Osyǵan baılanysty Energetıka mınıstrligi buqaralyq aqparat quraldaryna, blogerlerge jáne onlaın-qoǵamdastyqtardyń ákimshilerine aqparatty taratýǵa jaýapkershilikpen qaraýǵa, faktilerdi muqııat tekserýge jáne azamattardy jańylystyrmaý úshin tek resmı derekterdi paıdalanýǵa shaqyrady.

Budan buryn habarlanǵandaı, Energetıka mınıstrligi elimizdi AI-95 markaly benzınmen qamtamasyz etý máselesin baqylaýda ustap otyr.