Eldiń basym bóliginde jaýyn-shashyndy bolady

ASTANA. KAZINFORM – «Qazgıdromet» RMK mamandary respýblıkamyz boıynsha 24 maýsymǵa arnalǵan aýa raıy boljamyn jarııalady. 

Respýblıka aýmaǵynyń basym bóliginde tsıklon men soǵan baılanysty atmosferalyq fronttyń áserinen jańbyr jaýyp, naızaǵaı oınaıdy. Eldiń batysynda, ońtústik-batysynda jáne shyǵysynda jańbyr jaýady, al batysta, soltústikte, shyǵysta jáne ortalyqta burshaq jaýyp, ekpindi jel turady. Respýblıka boıynsha jeldiń kúsheıýi kútiledi. Eldiń soltústiginde túnde jáne tańerteń tuman bolady.

Abaı oblysynyń ortalyǵynda, Pavlodar oblysynyń ońtústik-shyǵysynda, Aqmola oblysynyń soltústik-batysynda, Jambyl oblysynyń ońtústigi men soltústiginde, Batys Qazaqstan oblysynyń batysynda, ońtústiginde jáne ortalyǵynda, Soltústik Qazaqstan oblysynyń ońtústiginde, Atyraý oblysynyń soltústiginde, Mańǵystaý oblysynyń soltústik-batysy, ońtústigi men shyǵysynda, Shyǵys Qazaqstan oblysynyń soltústiginde órt qaýpiniń joǵary deńgeıi saqtalady.

Almaty, Jambyl, Qyzylorda, Túrkistan oblystarynda, Qaraǵandy oblysynyń batysy, shyǵysy jáne ońtústiginde, Ulytaý oblysynda, Aqtóbe oblysynyń batysy, ońtústigi, shyǵysy men ortalyǵynda, Atyraý oblysynyń ortalyǵynda, Mańǵystaý oblysynyń soltústik-shyǵysy men ortalyǵynda, Qostanaı oblysynyń soltústigi men ońtústiginde, Jetisý oblysynyń soltústigi, shyǵysy jáne ortalyǵynda, Abaı oblysynyń batysy, soltústik-batysy men ońtústiginde, Shyǵys Qazaqstan oblysynyń ońtústik-shyǵysynda tótenshe órt qaýpi kútiledi.

Kúndiz Jambyl oblysynda, Túrkistan oblysynyń batysy men shóldi aımaqtarynda 40 gradýsqa deıingi qatty ystyq bolady. Almaty, Jetisý oblystarynda jáne Abaı oblysynyń ońtústiginde 35-38 gradýs qatty ystyq bolady.