Eldiń ár óńirinde medıtsınalyq check up qansha turady
ASTANA. KAZINFORM — Ár óńir turǵynyna tolyq tekserýden ótý qanshaǵa túsetinin Kazinform agenttiginiń tilshisi anyqtap kórdi.
«Saý adam bolmaıdy, tek tolyq tekserilmegen adam ǵana bar» degen sóz bar. Bul sózdiń jany bar. Óıtkeni siz durys ómir saltyn ustanyp, durys tamaqtanyp, sportpen shuǵyldansańyz da, densaýlyǵyńyzda belgili bir aýrýlar paıda bolýy múmkin. Keıbiri asa qaýipti emes, al keıbiri ómirge qater tóndiredi. Qaýipti zardaptardyń aldyn alýǵa erte dıagnostıka kómektesedi.
Sonymen qatar uzaq ýaqyt boıy eshqandaı belgi bermeıtin aýrýlar bar. Sımptomy bolmaıdy, adam tipti densaýlyǵynda kinárat baryn bilmeıdi. Al dabyl qaǵar belgiler paıda bolǵanda, kesh bolyp ketýi múmkin. Sondyqtan dárigerler kútpeı, ýaqytyly check up, ıaǵnı tolyq tekserýden ótip turýǵa keńes beredi. Ásirese otbasynda qaterli isik, dıabet nemese júrek-qan tamyr aýrýlary bolǵan adamdarǵa óte mańyzdy.
Check up-tyń túrleri ártúrli: birneshe saǵatta ótetin bazalyq tekserýden bastap, birneshe kúndi qajet etetin keńeıtilgen tekserý bar.
Qazaqstan óńirlerindegi baǵalardy salystyra ketsek. Aıta keteıik, tekseristen ótý quny alynatyn analızderdiń sanyna jáne medıtsınalyq mekemege baılanysty ózgerip otyrady.
Kóbine qazaqstandyqtar naqty bir organǵa nemese júıege qatysty check up tańdaıdy. Mysaly: júrek-qan tamyr júıesi, qalqansha bez, dıabetke, onkologııaǵa, búırekke, asqazan-ishek joldaryna, allergııaǵa, parazıtterge arnalǵan check up. Eldiń barlyq aımaǵynda mundaı zertteýlerdiń baǵasy orta eseppen 17 myńnan 60 myń teńge aralyǵynda qubylady. Keıbir óńirlerde tipti keńsege jumys isteıtin qyzmetkerlerge arnalǵan arnaıy check up bar, ol shamamen 50 myń teńge turady.
Salystyrý úshin jalpy aǵzany tekserýdi – erlerge jáne áıelderge arnalǵan check up-ty qarastyrsaq.
Check up-qa nege kiredi?
Mysaly, Kókshetaýdaǵy «Erler densaýlyǵy» check up-yna: qannyń jalpy taldaýy, zár taldaýy, qant mólsheri, jalpy PSA, erkin PSA, jambas aǵzalarynyń ÝDZ, ýrologtyń qaraýy, gormonaldy fon (FSG, LG, prolaktın, testosteron, TTG), spermogramma, andrologtyń qaraýy, jynystyq ınfektsııalardy anyqtaý kiredi.
Al «Áıelder densaýlyǵy» check up-yna: qan jáne zár taldaýy, SA-15-3 (sút bezi isiginiń onkomarkeri), SA-125 (analyq bezdiń onkomarkeri), mıkrofloraǵa jaǵyndy, jambas aǵzalarynyń ÝDZ, sút bezderiniń ÝDZ, kolposkopııa, gınekologtyń qabyldaýy, gormonaldy fon (FSG, LG, estradıol, prolaktın, testosteron, kortızol, progesteron), jynystyq ınfektsııalardy anyqtaý jáne venerolog qabyldaýy kiredi.
Áıelderge arnalǵan check up baǵasy óńirlerde:
Eń arzan baǵa: Aqtóbede: 15 000 tg-den bastalady.
Pavlodar – 27 400 tg-den, Qaraǵandy – 40 000 tg-den, Astana – 43 400 tg-den.
Jezqazǵan men Petropavlda ortasha baǵa – 45 000 tg-den.
Qymbat baǵa: Oral – 62 410 tg-den, Kókshetaý – 69 400 tg-den, Semeı – 69 900 tg-den.
70 myńnan joǵary: Taraz, Shymkent – 74 100 tg, Qyzylorda – 77 590 tg.
Eń qymbat baǵa: Óskemen – 82 797 tg-den, Almaty – 90 000 tg-den, Túrkistan – 113 120 tg-den, Qostanaı – 200 235 tg-den.
Erlerge arnalǵan check up baǵasy óńirlerde:
Eń arzan baǵa: Aqtóbede: 15 000 tg-den.
Pavlodar – 26 000 tg-den, Almaty – 29 000 tg-den.
Ortasha baǵa: Jezqazǵan – 35 000 tg-den, Qaraǵandy – 37 000 tg-den, Astana – 41 880 tg-den.
Qymbat baǵa: Kókshetaý – 57 600 tg-den, Oral – 62 220 tg-den, Semeı – 69 900 tg-den, Taraz – 70 000 tg-den, Qyzylorda – 77 590 tg-den, Shymkent – 82 404 tg-den.
Eń qymbat: Óskemen – 106 558 tg-den, Túrkistan – 110 360 tg-den, Petropavl – 118 322 tg-den, Qostanaı – 184 595 tg-den.
Aıta ketelik Ulytaý oblysynda Densaýlyq saqtaý mınıstrliginiń arnaıy jumys toby qurylady.