Eldiń eńbek naryǵynda qaı mamandyqtarǵa suranys joǵary

ASTANA. KAZINFORM – Eńbek jáne halyqty áleýmettik qorǵaý mınıstrligi maman tapshylyǵy Qazaqstannyń qaı óńirlerinde erekshe baıqalǵany jaıynda túsinik berdi.

- Búginde Elektrondy eńbek bırjasy portalynda jumys berýshilerden 54,8 myńǵa jýyq bos jumys orny jarııalanǵan. Onyń ishinde, eń joǵary suranys iri megapolısterde, ıaǵnı Astana (7 myń), Almaty (5,1 myń) jáne Shymkent (1,8 myń) qalalarynda tirkeldi. Sondaı-aq Qostanaı (4,2 myń), Pavlodar (3,7 myń), Qaraǵandy (3,6 myń) jáne Shyǵys Qazaqstan (3,3 myń) oblystarynda baıqaldy, - delingen vedomstvonyń Kazinform agenttigine bergen jaýabynda.

Osy oraıda mınıstrliktiń negizgi joǵary suranysy bar baǵyttardy naqtylady. Máselen, biliktilikti talap etpeıtin salalarǵa 6,4 myń adam kerek. Sonymen qatar bilim salasyna – 9,9 myńǵa jýyq, óndiriste – 6,2 myń, medıtsınada – 4,8 myń, kólik jáne logıstıkada - 3,3 myń, qarjy jáne esep salasynda 1,6 myńǵa tarta maman qajet.

Aıta keteıik, buǵan deıin tsıfrlyq tehnologııalar otandyq eńbek naryǵyna qalaı áser etip otyrǵanyn jazǵan edik.